બીજી તરફ બાંગ્લાદેશે ઝિમ્બાબ્વે સામે ત્રણ રને રોમાંચક વિજય નોંધાવ્યો હતો. જેના કારણે ટીમનો આત્મવિશ્વાસ વધ્યો છે. જોકે, ટી20માં બાંગ્લાદેશ વિરુદ્ધ ભારતનું પલડું ભારે રહ્યું છે. બંને ટીમ વચ્ચે રમાયેલી 11 ટી20 મેચમાં ભારતનો 10 મેચમાં વિજય થયો છે. જ્યારે બાંગ્લાદેશે એક મેચ જીતી છે. આ મુકાબલા પહેલા બાંગ્લાદેશી સુકાની શાકિબ અલ હસને મોટું નિવેદન આપ્યું છે. તેણે કહ્યું છે કે ભારતીય ટીમ ટી20 વર્લ્ડ કપ જીતવા આવી છે પરંતુ બાંગ્લાદેશ રોહિત શર્માની ટીમને હરાવીને અપસેટ સર્જવા ઈચ્છે છે.
શાકિબે જણાવ્યું હતું કે, ભારત પ્રબળ દાવેદાર ટીમ છે. તે અહીં ટાઈટલ જીતવા આવી છે. અમે દાવેદાર નથી અને અમે વર્લ્ડ કપ જીતવા માટે આવ્યા નથી. તેથી તમે પરિસ્થિતિ સમજી શકો છો અને અમે તે વાતને જાણીએ છીએ. જો અમે ભારતને હરાવીશું તો આ એક અપસેટ હશે. અમે અમારું સર્વશ્રેષ્ઠ પ્રદર્શન કરીશું અને અપસેજ સર્જવાનો પ્રયાસ કરીશું.
નોંધનીય છે કે ભારતીય ટીમે ટી20 વર્લ્ડ કપમાં પોતાની પ્રથમ મેચમાં પાકિસ્તાનને પરાજય આપ્યો હતો. આ મુકાબલો અત્યંત રોમાંચક રહ્યો હતો અને છેલ્લા બોલે ટીમ ઈન્ડિયાનો વિજય થયો હતો. જ્યારે બીજા મુકાબલામાં નેધરલેન્ડ્સ વિરુદ્ધ મોટા અંતરથી વિજય નોંધાવ્યો હતો. જોકે, સાઉથ આફ્રિકા સામે ભારતીય ટીમને પરાજયનો સામનો કરવો પડ્યો હતો. આ મુકાબલામાં ભારતીય બોલર્સે વળતો પ્રહાર કર્યો હતો પરંતુ અંતિમ ઓવરમાં ટીમ હારી ગઈ હતી. હવે ભારતે બાંગ્લાદેશ સામે વિજય નોંધાવવો પડશે.