રિષભ પંતની વાપસી પર સૌથી મોટું અપડેટ
રિષભ પંત આ દિવસોમાં નેશનલ ક્રિકેટ એકેડમી (NCA)માં છે. મેડિકલ અપડેટ મુજબ રિષભ પંત રિહેબિલિટેશનમાં ઝડપથી સ્વસ્થ થઈ રહ્યો છે. નેટ્સમાં બેટિંગની સાથે તેણે કીપિંગ પણ શરૂ કરી દીધું છે. હવે સમાચાર આવી રહ્યા છે કે રિષભ પંત 2024માં ઈંગ્લેન્ડ વિરુદ્ધ એક્શનમાં જોવા મળી શકે છે. ટીમ ઈન્ડિયાને આવતા વર્ષે જાન્યુઆરી-ફેબ્રુઆરીમાં ઈંગ્લેન્ડ સામે 5 ટેસ્ટ રમવાની છે.
30 ડિસેમ્બર 2022ના રોજ પંતની કારનો અકસ્માત થયો હતો
રિષભ પંતે તેની છેલ્લી મેચ ડિસેમ્બર 2022માં બાંગ્લાદેશ સામે રમી હતી. પંતની કાર 30 ડિસેમ્બરે સવારે 5.30 વાગ્યે રૂરકીના નરસન બોર્ડર પર હમ્માદપુર ઝાલ પાસે રેલિંગ સાથે અથડાઈ હતી. આ અકસ્માત બાદ કારમાં આગ લાગી હતી અને આ અકસ્માતમાં પંત ગંભીર રીતે ઘાયલ થયો હતો. આ ઘટના બાદ તેને દહેરાદૂનમાં દાખલ કરવામાં આવ્યો હતો, ત્યાર બાદ તેને એરલિફ્ટ કરીને મુંબઈ લઈ જવામાં આવ્યો હતો. તમને જણાવી દઈએ કે પંતના ઘૂંટણ અને પગની ઘૂંટીના લિગામેન્ટ ટીયર સર્જરી કરવામાં આવી હતી.
છેલ્લી મેચ બાંગ્લાદેશ સામે રમાઈ હતી
રિષભ પંતે વર્ષ 2022માં ટીમ ઈન્ડિયા માટે કુલ 7 ટેસ્ટ મેચ રમી હતી. આ દરમિયાન તેણે 61.81ની એવરેજથી 680 રન બનાવ્યા હતા. બીજી તરફ, પંતે ગયા વર્ષે ભારત માટે 12 વનડેમાં 37.33ની એવરેજથી 336 રન બનાવ્યા હતા. ટી20ની વાત કરીએ તો આ ફોર્મેટમાં તેણે ગયા વર્ષે 25 મેચ રમીને 21.41ની એવરેજથી માત્ર 364 રન બનાવ્યા હતા. જ્યારે ડિસેમ્બર 2022માં ભારતે બાંગ્લાદેશ સામે ટેસ્ટ શ્રેણી 2-0થી જીતી હતી. 25 ડિસેમ્બરના રોજ સમાપ્ત થયેલી બીજી ટેસ્ટમાં, તેણે શેર-એ-બાંગ્લા નેશનલ ક્રિકેટ સ્ટેડિયમમાં ભારતની પ્રથમ ઇનિંગમાં મેચ-વિનિંગ 93 રન બનાવ્યા હતા.