મોહમ્મદ સિરાજનો તરખાટ, પંજાબ કિંગ્સના બેટર્સે નિરાશ કર્યા
175 રનના લક્ષ્યાંકને પાર પાડવા મેદાનમાં ઉતરેલી પંજાબની શરૂઆત અત્યંત ખરાબ રહી હતી. અથર્વ ટાઈડે અને પ્રભસિમરન સિંહની જોડી ટીમને સારી શરૂઆત અપાવી શકી ન હતી. અથર્વ ચાર રન નોંધાવીને આઉટ થયો હતો. ત્યારબાદ મેથ્યુ શોર્ટ આઠ અને લિયામ લિવિંગસ્ટોન બે રન નોંધાવીને પેવેલિયન ભેગા થયા હતા. ટીમનો સ્કોર 27 રન હતો તેણે ત્રણ વિકેટ ગુમાવી દીધી હતી. પરંતુ પ્રભસિમરને એક છેડો જાળવી રાખ્યો હતો. જોકે, મિડલ ઓર્ડરના બેટર તરફથી પણ તેને સપોર્ટ મળ્યો ન હતો.
હરપ્રીત ભાટીયા 13 અને કેપ્ટન સેમ કરન 10 રન નોંધાવીને આઉટ થયો હતો. 106 રનના સ્કોર પર પંજાબની સાત વિકેટ પડી ગઈ હતી. પ્રભસિમરને 30 બોલમાં ત્રણ ચોગ્ગા અને ચાર સિક્સરની મદદથી 46 રન ફટકાર્યા હતા. જ્યારે જિતેશ શર્માએ 27 બોલમાં બે ચોગ્ગા અને ત્રણ સિક્સર સાથે 41 રનની ઈનિંગ્સ રમી હતી. રોયલ ચેલેન્જર્સ બેંગલોર માટે મોહમ્મદ સિરાજે ચાર વિકેટ ઝડપી હતી. જ્યારે વાનિન્દુ હસારંગાએ બે તથા વેન પાર્નેલ અને હર્ષલ પટેલને એક-એક સફળતા મળી હતી.
વિરાટ કોહલી અને ફાફ ડુપ્લેસિસની આક્રમક અડધી સદી
પ્રથમ બેટિંગનું આમંત્રણ મળ્યા બાદ બેંગલોરે ધમાકેદાર શરૂઆત કરી હતી. વિરાટ કોહલી અને ફાફ ડુપ્લેસિસે આક્રમક અંદાજમાં બેટિંગ કરી હતી. જેમાં ડુપ્લેસિસ વધારે આક્રમક રહ્યો હતો. બંને ખેલાડીઓએ અડધી સદી ફટકારી હતી. આ જોડીએ 16.1 ઓવરમાં 137 રનની ભાગીદારી નોંધાવી હતી. કોહલીએ 47 બોલમાં પાંચ ચોગ્ગા અને એક સિક્સરની મદદથી 59 રન ફટકાર્યા હતા. જ્યારે ડુપ્લેસિસ 56 બોલમાં 84 રન ફટકાર્યા હતા. જેમાં પાંચ ચોગ્ગા અને પાંચ સિક્સર ફટકારી હતી. મેક્સવેલ ખાતું ખોલાવી શક્યો ન હતો. જ્યારે દિનેશ કાર્તિકે સાત, લોમરોરે અણનમ સાત અને શાહબાઝ અહેમદે અણનમ પાંચ રનનું યોગદાન આપ્યું હતું. પંજાબ માટે હરપ્રીત બ્રારે બે તથા અર્શદીપ સિંહ અને નાથન એલિસે એક-એક વિકેટ ઝડપી હતી.