રવિચંદ્રન અશ્વિન છેલ્લી બે વર્લ્ડ ટેસ્ટ ચેમ્પિયનશિપ સાયકલમાં ભારત માટે સૌથી વધુ વિકેટ લેનાર બોલર છે અને તેણે કુલ 61 વિકેટ ઝડપી છે. યુટ્યુબ ચેનલના શોમાં અશ્વિને ઓસ્ટ્રેલિયન કેપ્ટન પેટ કમિન્સના વખાણ કર્યા હતા. તેણે કહ્યું હતું કે, અભિનંદન ઓસ્ટ્રેલિયા! તે એક શાનદાર ફાઈનલ હતી. લાબુશેન સતત કાઉન્ટી ક્રિકેટ રમી રહ્યો હતો, તે પણ ઓસ્ટ્રેલિયા માટે ફાયદાકારક રહ્યું.
અશ્વિને ત્યારપછી ભારતીય ટીમને તેમના ICC ટ્રોફીના દુષ્કાળને સમાપ્ત કરવાની બીજી તક ગુમાવવા માટે સોશિયલ મીડિયા પર મળી રહેલી પ્રતિક્રિયાઓ વિશે વાત કરી હતી, જ્યાં મોટાભાગના લોકો ધોની પર પોસ્ટ કરી રહ્યા હતા, જેણે ભારતને ત્રણ ICC ટ્રોફી જીતાડી હતી. 36 વર્ષીય અશ્વિને ધ્યાન દોર્યું હતું કે ધોનીની સફળતા પાછળનું કારણ પસંદગીની ટીમમાં ખેલાડીઓને આપવામાં આવતી સુરક્ષાની ભાવના હતી. બે સપ્તાહમાં આ બીજી વખત છે જ્યારે અશ્વિને કોઈ ખેલાડીના મનમાં ‘સુરક્ષાની ભાવના’ ઉભી કરવાના વિશે વાત કરી.
તેણે કહ્યું હતું કે, મને ચાહકો પ્રત્યે સહાનુભૂતિ છે, પરંતુ કોઈ ખેલાડી રાતોરાત બદલાતો નથી. આપણામાંથી ઘણા બધા લોકો મહેન્દ્ર સિંહ ધોનીના નેતૃત્વ વિશે વાત કરે છે. તેણે શું કર્યું? તેણે બધી બાબતો ખૂબ જ સરળ રાખી હતી. હું ઘણા વર્ષો સુધી માહીની કેપ્ટનશિપમાં રમ્યો હતો. ધોની 15ની ટીમ પસંદ કરતો હતો. પછી તે જ 15ને આગામી ટીમમાં પણ તક આપવામાં આવતી હતી. તે આખા વર્ષ દરમિયાન એક જ પ્લેઈંગ ઈલેવન સાથે રમતો હતો. ખેલાડી માટે સુરક્ષાની લાગણી ખૂબ જ મહત્વપૂર્ણ છે.