mohammed shami, IND Vs AUS T20 World Cup: આવતાની સાથે જ Mohammed Shami છવાઈ ગયો, ઓસ્ટ્રેલિયાના પક્ષમાં ગયેલી મેચમાં જીત અપાવી – t20 wc warm up mohammed shami sharp bowling match was taken away from australia

IND Vs AUS T20, Warm UP Match: મોહમ્મદ શમીએ અંતિમ ઓવરમાં ઘાતક બોલિંગ કરીને ભારતીય ટીમને ઓસ્ટ્રેલિયા સામે વોર્મ અપ મેચમાં જીત અપાવી છે. મેચમાં વિરાટ કોહલીની શાનદાર ફિલ્ડિંગનો પણ દમ જોવા મળ્યો હતો. વર્લ્ડકપ શરુ થાય તે પહેલા ભારતે ઓસ્ટ્રેલિયાને 6 રનોથી હરાવ્યું છે. શમીને મેચમાં લેવામાં આવ્યો હતો પરંતુ તેને અંતિમ ઓવર આપવામાં આવી હતી જેમાં અંતિમ ચાર બોલમાં 4 વિકેટ મળી હતી. જેમાં એક રન આઉટ હતો. અંતિમ ઓવરમાં પહોંચેલી મેચમાં ઓસ્ટ્રેલિયાનું પલડું ભારે લાગી રહ્યું હતું, પરંતુ શમીએ પહેલા બે બોલમાં 2-2 રન આપ્યા પછી તરખાટ મચાવ્યો હતો. જસપ્રિત બુમરાહની ગેરહાજરીમાં શમીએ તેની જ સ્ટાઈલમાં યોર્કર બોલ નાખીને કમાલ કરી બતાવી છે.

ભારતે પહેલા બેટિંગ કરીને ઓસ્ટ્રેલિયાની સામે 7 વિકેટ ગુમાવીને 186 રન કર્યા હતા. જવાબમાં 187 રનના લક્ષ્યનો પીછો કરવા ઉતરેલી ઓસ્ટ્રેલિયાની ટીમે સારી શરુઆત કર્યા બાદ ભારતીય બોલરોએ તરખાટ મચાવ્યો હતો. ઓસ્ટ્રેલિયાના માત્ર શરુઆતના ચાર જ બેટ્સમેનો ડબલ ડીજીટમાં સ્કોર કરવામાં સફળ રહ્યા હતા જેમાં એરોન ફિંચે 54 બોલમાં 76 રન બનાવ્યા હતા. આ સિવાય મિશેલ માર્શે 35, ગ્લેન મેક્સવેલે 23 અને સ્ટેવન સ્મિથે 11 રન બનાવ્યા હતા. આ પછી આખી ટીમ પડી ભાગી હતી જેમાં અંતિમ ત્રણ ખેલાડીઓ ખાતું પણ નહોતા ખાલાવી શક્યા.

ભારત તરફથી ઓપનિંગ જોડીએ સારી શરુઆત કરી હતી પરંતુ રોહિત શર્મા 15 રનના અંગત સ્કોર પર આઉટ થઈ ગયો હતો. કેએલ રાહુલે ટીમમાં સૌથી વધારે 57 રન બનાવ્યા હતા, જ્યારે સૂર્યકુમાર યાદવે 33 બોલમાં 4 છગ્ગા અને 1 છગ્ગા સાથે 50 રન બનાવ્યા હતા. આ સિવાય કોહલી 19, દિનેશ કાર્તિકે 20, અક્ષર અને અશ્વિન 6-6 તથા હાર્દિક પંડ્યા 2 રનનું યોગદાન આપી શક્યા હતા.

મોહમ્મદ શમીએ 3, ભૂવનેશ્વર કુમારે 2 અને અર્શદીપ તથા હર્ષલ પટેલે 1-1 વિકેટ લીધી હતી. હાર્દિક પંડ્યા, રવિચંદ્રન અશ્વિનને એકપણ સફળતા નહોતી મળી. ઓસ્ટ્રેલિયા તરફથી કેન રિચર્ડશને ધારદાર બોલિંગ કરીને ચાર વિકેટ લીધી હતી, જેણે સૂર્યકુમાર યાદવ, હાર્દિક પંડ્યા, દિનેશ કાર્તિક અને અશ્વિનની વિકેટો લીધી હતી. જ્યારે મેક્સવેલ અને અગરે 1-1 વિકેટ લીધી હતી.

મોહમ્મદ શમીનો તરખાટ
જસપ્રીત બુમરાહની જગ્યાએ ટીમમાં આવેલા અનુભવી મોહમ્મદ શમીએ આખી મેચમાં રાહ જોયા બાદ તેના હાથમાં અંતિમ ઓવરમાં બોલ આવ્યો હતો. આ સમયે ઓસ્ટ્રેલિયાને જીતવા માટે 11 રનની જરુર હતી જેમાં પહેલા બે બોલમાં પેટ કમિન્શને 2-2 રન લઈને સારી શરુઆત કરી હતી, પરંતુ આ પછી તે કોહલીના હાથે કેચ આઉટ થયો હતો અને આશટોન અગર રન આઉટ થયો અને જોશ ઈંગ્લિશ તથા કેન રિચર્ડશનને શમીએ બોલ્ડ કર્યા હતા. આમ ઓસ્ટ્રેલિયા સામે ભારતે 6 રનથી વિજય મેળવ્યો હતો.