ઈશાન કિશનની અડધી સદી, રોહિત શર્માની આક્રમક બેટિંગ
178 રનના લક્ષ્યાંકના જવાબમાં મુંબઈ ઈન્ડિયન્સે શાનદાર શરૂઆત કરી હતી. ઈશાન કિશન અને કેપ્ટન રોહિત શર્માની જોડીએ શરૂઆતથી જ આક્રમક વલણ અપનાવ્યું હતું. આ જોડીએ 9.4 ઓવરમાં 90 રનની ભાગીદારી નોંધાવી હતી. રોહિત શર્મા 25 બોલમાં એક ચોગ્ગા અને ત્રણ સિક્સરની મદદથી 37 રન ફટકારીને આઉટ થયો હતો. જ્યારે ઈશાન કિશને 39 બોલમાં આઠ ચોગ્ગા અને એક સિક્સર સાથે 59 રન ફટકાર્યા હતા. 90 રને પ્રથમ વિકેટ ગુમાવ્યા બાદ મુંબઈએ ઉપરા-ઉપરી વિકેટો ગુમાવી હતી.
સૂર્યકુમાર યાદવ નિષ્ફળ રહ્યો હતો અને તે નવ બોલમાં સાત રન નોંધાવીને આઉટ થયો હતો. જ્યારે નેહલ વાઢેરાએ 20 બોલમાં 16 રનનું યોગદાન આપ્યું હતું. ઉપરા-ઉપરી વિકેટો ગુમાવવાના કારણે મુંબઈ પ્રેશરમાં આવી ગયું હતું. ટિમ ડેવિડે આક્રમક બેટિંગ કરીને ટીમને જીતાડવાના પ્રયાસ કર્યા હતા પરંતુ તે ટીમને વિજય અપાવી શક્યો ન હતો. ડેવિડે 19 બોલમાં એક ચોગ્ગા અને ત્રણ સિક્સરની મદદથી અણનમ 32 રન ફટકાર્યા હતા. લખનૌ માટે યશ ઠાકુર અને રવિ બિશ્નોઈએ બે-બે વિકેટ ઝડપી હતી જ્યારે મોહસિન ખાનને એક સફળતા મળી હતી.
સ્ટોઈનિસની આક્રમક અડધી સદી, કેપ્ટન કૃણાલ પંડ્યાની મહત્વની ઈનિંગ્સ
મુંબઈ ઈન્ડિયન્સ ટોસ જીતીને લખનૌ સુપરજાન્ટ્સ ટીમને પ્રથમ બેટિંગનું આમંત્રણ આપ્યું હતું. જોકે, લખનૌના ટોપ ઓર્ડરનો ધબડકો થયો હતો. ટીમે 35 રનમાં પોતાની ટોચની ત્રણ વિકેટ ગુમાવી દીધી હતી. ઓપનર દીપક હૂડા પાંચ રન નોંધાવીને આઉટ થયો હતો. જ્યારે ક્વિન્ટન ડીકોક 16 રન નોંધાવને પેવેલિયન ભેગો થયો હતો. પ્રેરક માંકડ ખાતું પણ ખોલાવી શક્યો ન હતો. જોકે, ત્યારબાદ કેપ્ટન કૃણાલ પંડ્યા અને માર્ક્સ સ્ટોઈનિસે આક્રમક અંદાજમાં બેટિંગ કરી હતી.
સ્ટોઈનિસ વધારે આક્રમક રહ્યો હતો અને તેણે મુંબઈના બોલર્સની ધોલાઈ કરી હતી. જોકે, કેપ્ટન કૃણાલ પંડ્યાને રિટાયર્ડ હર્ટ થઈને પેવેલિયન ભેગા થવું પડ્યું હતું. તેણે 42 બોલમાં એક ચોગ્ગા અને એક સિક્સરની મદદથી 49 રન નોંધાવ્યા હતા જ્યારે સ્ટોઈનિસ 47 બોલમાં 89 રન નોંધાવીને નોટઆઉટ રહ્યો હતો. તેણે ચાર ચોગ્ગા અને આઠ સિક્સર ફટકારી હતી. મુંબઈ ઈન્ડિયન્સ માટે બેહરેન્ડોર્ફે બે તથા પિયુષ ચાવલાએ એક વિકેટ ઝડપી હતી.