7મી ઓવર પછી ગેમ પલટાઈ
દિલ્હી કેપિટલ્સને 168 રનનો ટાર્ગેટ મળ્યો હતો અને ટીમની શરૂઆત ધમાકેદાર રહી હતી. કેપ્ટન ડેવિડ વોર્નરે પોતે આગેવાની લીધી હતી. 6 ઓવર પછી ટીમનો સ્કોર એકપણ વિકેટ ગુમાવ્યા વિના 65 રન હતો. એટલે કે રન રેટ 10થી ઉપર હતો. વોર્નર 21 બોલમાં 48 રન બનાવીને રમી રહ્યો હતો. હવે દિલ્હીને 84 બોલમાં માત્ર 103 રનની જરૂર હતી. 7મી ઓવરના પહેલા જ બોલ પર ફિલ સોલ્ટે હરપ્રીત બ્રારને ચોગ્ગો ફટકાર્યો હતો. પરંતુ આ પછી જે થયું તે પંજાબ માટે પણ સપનાથી ઓછું ન હતું.
દિલ્હીનો સ્કોર જોતજોતામાં 88/6 થયો
7મી ઓવરના બીજા બોલ પર સોલ્ટ બોલ્ડ થઈ ગયો હતો. રાહુલ ચહરે 8મી ઓવરમાં મિશેલ માર્શની વિકેટ લીધી હતી. હરપ્રીત બ્રારે 9મી ઓવરમાં પહેલા રિલે રુસો અને પછી ડેવિડ વોર્નરને પેવેલિયન ભેગા કર્યા હતા. રાહુલ ચહરે ત્યારપછી અક્ષર પટેલને એલબીડબલ્યુ આઉટ કર્યો અને 11મી ઓવરમાં મનીષ પાંડે પણ પેવેલિયન ભેગો થયો હતો. દિલ્હીની ટીમ કે જેનો સ્કોર 6.1 ઓવરમાં 69/0 હતો, તે 10.1 ઓવર પછી 88/6 થઈ ગયો હતો. અહીંથી ટીમની હાર નિશ્ચિત થઈ ગઈ હતી.
ચહર અને હરપ્રીત હીરો રહ્યા
પંજાબ કિંગ્સ તરફથી આ મેચમાં હરપ્રીત બ્રારે 4 ઓવરમાં 30 રન આપીને 4 વિકેટ ઝડપી હતી. તેણે પાવરપ્લેમાં તેની પ્રથમ ઓવરમાં 13 રન આપ્યા હતા. લેગ સ્પિનર રાહુલ ચહરે ચાર ઓવરમાં માત્ર 16 રન આપ્યા અને 2 વિકેટ લીધી. આ બંનેના સ્પેલથી એ સુનિશ્ચિત થયું કે દિલ્હી IPL 2023માં પ્લેઓફમાં જગ્યા બનાવી શકશે નહીં.