ડેવોન કોનવેની આક્રમક સદી એળે ગઈ, ન્યૂઝીલેન્ડના બેટર્સ નિષ્ફળ રહ્યા
386 રનના લક્ષ્યાંકને પાર પાડવા માટે ન્યૂઝીલેન્ડને આક્રમક શરૂઆતની જરૂર હતી. જોકે, ફિન એલન અને ડેવોન કોનવેએ ઈનિંગ્સની શરૂઆત કરી હતી. જોકે, ફિન એલન બીજા જ બોલ પર આઉટ થયો હતો. તે ખાતું પણ ખોલાવી શક્યો ન હતો. કોનવેએ જોકે આક્રમક બેટિંગ કરી હતી. તેણે હેન્રી નિકોલ્સ સાથે મળીને મળીને 14.5 ઓવરમાં 106 રનની ભાગીદારી નોંધાવી હતી. નિકોલ્સે 40 બોલમાં ત્રણ ચોગ્ગા અને બે સિક્સરની મદદથી 42 રનની ઈનિંગ્સ રમી હતી. જ્યારે ડેરીલ મિચેલ 24 રન નોંધાવીને આઉટ થયો હતો.
મિડલ ઓર્ડરમાં કેપ્ટન ટોમ લાથમ ખાતું ખોલાવ્યા વગર પેવેલિયન ભેગો થયો હતો જ્યારે ગ્લેન ફિલિપ્સ પાંચ રન જ નોંધાવી શક્યો હતો. આ દરમિયાન કોનવેએ એક છેડો જાળવી રાખ્યો હતો પરંતુ સામે છેડે તેને યોગ્ય સાથ મળ્યો ન હતો. તેણે 100 બોલમાં 12 ચોગ્ગા અને 8 સિક્સરની મદદથી 138 રનની આક્રમક ઈનિંગ્સ રમી હતી. આ ઉપરાંત માઈકલ બ્રાસ્વેલે 26 અને મિચેલ સેન્ટનરે 34 રનનું યોગદાન આપ્યું હતું. ભારત માટે શાર્દુલ ઠાકુર તથા કુલદીપ યાદવે ત્રણ-ત્રણ વિકેટ ઝડપી હતી. જ્યારે યુઝવેન્દ્ર ચહલને બે તથા ઉમરાન મલિક અને હાર્દિક પંડ્યાને એક-એક સફળતા મળી હતી.
રોહિત શર્મા અને શુભમન ગિલની તોફાની સદી
ન્યૂઝીલેન્ડે ટોસ જીત્યો હતો અને ભારતને પ્રથમ બેટિંગનું આમંત્રણ આપ્યું હતું. ભારત માટે કેપ્ટન રોહિત શર્મા અને શુભમન ગિલે ભારતીય ઈનિંગ્સની શરૂઆત કરી હતી. આ બંનેએ શરૂઆતથી જ આક્રમક વલણ અપનાવ્યું હતું અને ન્યૂઝીલેન્ડના બોલર્સની મન મૂકીને ધોલાઈ કરી હતી. એક પણ કિવિ બોલર આ બંને બેટર્સ સામે અસરકારક રહ્યો ન હતો. તેમણે 26.1 ઓવરમાં 212 રનની ભાગીદારી નોંધાવી હતી. રોહિત શર્માએ 16 ઈનિંગ્સ બાદ પ્રથમ સદી ફટકારી હતી જ્યારે શુભમન ગિલે છેલ્લી ચાર વન-ડેમાં ત્રીજી સદી ફટકારી હતી. રોહિત શર્માએ 85 બોલમાં 101 રન ફટકાર્યા હતા જેમાં નવ ચોગ્ગા અને છ સિક્સર સામેલ હતી. જ્યારે શુભમન ગિલે 78 બોલમાં 112 રનની તોફાની ઈનિંગ્સ રમી હતી. જેમાં તેણે 13 ચોગ્ગા અને 5 સિક્સર ફટકારી હતી.
અંતિમ ઓવર્સમાં હાર્દિક પંડ્યા અને શાર્દૂલ ઠાકુરની આક્રમક બેટિંગ
રોહિત શર્મા અને શુભમન ગિલે તોફાની શરૂઆત અપાવ્યા બાદ ભારતે ઝડપથી વિકેટ ગુમાવી દીધી હતી. ઈશાન કિશન 17 અને સૂર્યકુમાર યાદવ 14 રનનું યોગદાન આપ્યું હતું. વિરાટ કોહલીએ 36 રન ફટકાર્યા હતા. જ્યારે વોશિંગ્ટન સુંદરે નવ રનનું યોગદાન આપ્યું હતું. અંતિમ ઓવર્સમાં હાર્દિક પંડ્યા અને શાર્દુલ ઠાકુરે આક્રમક અંદાજમાં બેટિંગ કરી હતી. હાર્દિક પંડ્યાએ અડધી સદી ફટકારી હતી. તેણે 38 બોલમાં ત્રણ ચોગ્ગા અને ત્રણ સિક્સરની મદદથી 54 રન ફટકાર્યા હતા. જ્યારે શાર્દુલ ઠાકુરે 17 બોલમાં 25 રનનું યોગદાન આપ્યું હતું. ન્યૂઝીલેન્ડ માટે જેકોબ ડફી અને બ્લેર ટિકનરે ત્રણ-ત્રણ વિકેટ ઝડપી હતી. જ્યારે માઈકલ બ્રાસવેલને એક સફળતા મળી હતી.