પરંતુ બાદમાં રવિચંદ્રન અશ્વિન અને શ્રેયસ ઐય્યરે બાજી સંભાળી હતી અને ટીમને જીત અપાવી હતી. અશ્વિન અને ઐય્યરે ધીરજપૂર્વક બેટિંગ કરી હતી અને ભારતને જીત અપાવી હતી. અશ્વિને અણનમ 42 રન નોંધાવ્યા હતા જ્યારે શ્રેયસ ઐય્યર 29 રન નોંધાવીને નોટઆઉટ રહ્યો હતો. તેવામાં આપણે જોઈએ કે કેવી રીતે ભારતે હારની બાજી જીતમાં પલટી દીધી.
રવિચંદ્રન અશ્વિન અને શ્રેયસ ઐય્યરની અતૂટ ભાગીદારી
એક તરફ ભારતીય ટીમની વિકેટો ફટાફટ પડી રહી હતી ત્યારે બીજી તરફ અશ્વિન અને શ્રેયસ ઐય્યરની જોડીએ અત્યંત ધીરજપૂર્વક બેટિંગ કરી હતી અને ક્રિઝ પર ટકી રહ્યા હતા. શરૂઆતમાં બંનેએ વિકેટ જાળવી રાખીને ધીમી બેટિંગ કરી હતી. પરંતુ જેવો ટીમનો સ્કોર 100 રનની પાર પહોંચ્યો તે સાથે જ તેમણે બાંગ્લાદેશી બોલર્સને ભૂલો કરવા મજબૂર કરી દીધા હતા અને પોતાની ભાગીદારી મજબૂત બનાવી હતી. તેમણે 104 બોલમાં 71 રનની અતૂટ ભાગીદારી નોંધાવીને ટીમને જીત અપાવી હતી.
અક્ષર પટેલની દમદાર રમત
લક્ષ્યાંકનો પીછો કરતા જ્યારે ટીમ ઈન્ડિયાએ શરૂઆતની ત્રણ વિકેટ ઝડપથી ગુમાવી દીધી હતી. અક્ષર પટેલને નાઈટ વોચમેન તરીકે વિરાટ કોહલી અને રિશભ પંત કરતા પહેલા બેટિંગ માટે મોકલવામાં આવ્યો હતો. આ નિર્ણયને લઈને સુકાની અને કોચની ટીકા પણ થઈ હતી પરંતુ અક્ષર પટેલે તેને જે જવાબદારી સોંપવામાં આવી હતી તે યોગ્ય રીતે નીભાવી હતી. તેણે બાંગ્લાદેશના સ્પિનર્સનો મજબૂત રીતે સામનો કર્યો હતો. તેણે બીજા દાવમાં 34 રનની મહત્વની ઈનિંગ્સ રમી હતી.
શ્રેયસ ઐય્યરની શાનદાર બેટિંગ
ભારતની આ જીતમાં શ્રેયસ ઐય્યરે પણ મજબૂતીથી બેટિંગ કરી હતી. તેણે પ્રથમ દાવમાં પણ 87 રનની ઈનિંગ્સ રમી હતી. ત્યારબાદ ટાર્ગેટ પાર પાડતી વખતે પણ તેણે ધીરજપૂર્વક બેટિંગ કરીને અશ્વિન સાથે મળીને ટીમને ઉગારી લીધી હતી. તેણે અશ્વિનને પણ રન નોંધાવવા માટે પ્રોત્સાહિત કર્યો હતો.
અશ્વિનનું ઓલ-રાઉન્ડ પ્રદર્શન
અશ્વિને લક્ષ્યાંક પાર પાડતા સારી બેટિંગ તો કરી જ હતી પરંતુ તે પહેલા બોલિંગમાં પણ કમાલ કરી હતી. અશ્વિને પ્રથમ દાવમાં ચાર વિકેટ પોતાના નામે કરી હતી જ્યારે બીજા દાવમાં બે વિકેટ ઝડપી હતી. બીજા દાવમાં તેણે શાનદાર બેટિંગ કરતા અણનમ 42 રન ફટકાર્યા હતા. અશ્વિનને તેના આ ઓલ-રાઉન્ડ પ્રદર્શનના કારણે મેન ઓફ ધ મેચ પણ જાહેર કરવામાં આવ્યો હતો.