ભારતીય બેટિંગ લાઈનઅપનો પાંચમાં દિવસ ધબડકો થયો તે રમતની શરૂઆતના અડધા કલાક પહેલા શરૂ થયો હતો જ્યારે વિરાટ કોહલીએ સ્કોટ બોલેન્ડ સામે ઓફ સ્ટમ્પની બહાર વાઈડ ડિલિવરી પર કવર શોટ ફટકારવાનો પ્રયાસ કર્યો હતો. 34 વર્ષીય વિરાટ કોહલી ડ્રાઈવ ફટકારવા માટે ગયો પરંતુ બોલ સ્ટીવ સ્મિથ તરફ સ્લિપમાં ગયો હતો. ઓસ્ટ્રેલિયાના સ્ટારે પણ કોઈ જ ભૂલ કરી ન હતી અને કોહલીનો કેચ ઝડપી લીધો હતો. આ કેચ સાથે જ વિરાટ કોહલીની ઈનિંગ્સનો અંત આવ્યો હતો અને ભારતની આશાઓ પર પાણી ફરી વળ્યું હતું. કોહલી તેની 29મી અડધી સદીથી માત્ર એક રન દૂર હતો.
વિરાટ કોહલી પોતે જે રીતે આઉટ થયો તેનાથી સ્પષ્ટ રીતે નિરાશ હતો. બીજી તરફ ભારતના ભૂતપૂર્વ સુકાની સુનીલ ગાવસ્કર ગુસ્સે થયા હતા અને સ્ટાર બેટ્સમેનની આકરી ટીકા કરી હતી. ટીમના પ્રદર્શનથી નારાજ દેખાતા ગાવસ્કરે મેચ બાદ કોહલીના શોટ અંગે કર્યું હતું કે, તેનો શોટ ઘણો જ ખરાબ શોટ હતો. તે સામાન્ય શોટ હતો. તમે મને તેના વિશે પૂછો છો, પરંતુ મને લાગે છે કે તમારે કોહલીને પૂછવું જોઈએ. તે શોટ શું હતો? તે એક બોલ ઓફ સ્ટમ્પની બહાર હતો. મેચ જીતવા માટે કેટલી લાંબી ઈનિંગ્સની જરૂર છે તે વિશે અમે ઘણી વાત કરી છે. આવી મેચમાં તમે સદી ફટકારો તે જરૂરી છે. જો તમે અત્યાર સુધી ઓફ-સ્ટમ્પની બહાર શોટ રમવા જઈ રહ્યા છો, તો તમે મોટી ઈનિંગ્સ કેવી રીતે રમી શકશો.
સુનીલ ગાવસ્કરે એમ પણ કહ્યું હતું કે ભારતીય બેટ્સમેનોએ આ પેટર્નથી ઘણી વખત વિકેટ ગુમાવી છે. કોહલીના આઉટ થવા અંગે વધુ વાત કરતા તેમણે કહ્યું હતું કે તે એકદમ સામાન્ય શોટ હતો. બોલ ઓફ સ્ટમ્પની બહાર જઈ રહ્યો હતો. કદાચ તેને ખ્યાલ હતો કે તેને તેની અડધી સદી પૂરી કરવા માટે એક રનની જરૂર છે. જ્યારે તમે કોઈ માઈલસ્ટોનની નજીક હોવ ત્યારે આવું થાય છે.