બીજા દાવમાં ઓસ્ટ્રેલિયાની ખરાબ શરૂઆત
ઓસ્ટ્રેલિયાએ પ્રથમ દાવમાં 469 રનનો સ્કોર નોંધાવ્યો હતો. જોકે, બીજા દાવમાં તેની બેટિંગ નિરાશાજનક રહી છે. બીજા દાવમાં ટીમે બે રનના સ્કોર પર ડેવિડ વોર્નરની વિકેટ ગુમાવી દીધી હતી. ત્યારબાદ ઉસ્માન ખ્વાજા પણ 13 રન નોંધાવીને આઉટ થયો હતો. પ્રથમ દાવમાં સદી ફટકનારા સ્ટિવ સ્મિથ અને ટ્રેવિસ હેડ પણ નિષ્ફળ રહ્યા હતા. સ્મિથ 34 રન નોંધાવીને આઉટ થયો હતો જ્યારે ટ્રેવિસ હેડ 18 રન જ નોંધાવી શક્યો હતો. આ બંનેને રવિન્દ્ર જાડેજાએ આઉટ કર્યા હતા. જોકે, લાબુશેન ભારત માટે જોખમી બની શકે છે તેથી શનિવારે ચોથા દિવસે તેને ઝડપથી આઉટ કરવો પડશે. ભારત માટે રવિન્દ્ર જાડેજાએ બે તથા મોહમ્મદ સિરાજ અને ઉમેશ યાદવે એક-એક વિકેટ ઝડપી હતી.
રહાણે-ઠાકુરની લડત છતાં ભારત 296 રનમાં ઓલ-આઉટ
વર્લ્ડ ટેસ્ટ ચેમ્પિયનશિપની ફાઈનલમાં અજિંક્ય રહાણે અને શાર્દૂલ ઠાકુરે લડાયક ઈનિંગ્સ રમી હોવા છતાં ભારતીય ટીમનો પ્રથમ દાવ 296 રનમાં સમેટાઈ ગયો હતો. પ્રથમ દાવમાં ભારતના ટોચના બેટર્સ નિષ્ફળ રહ્યા હતા.ભારત માટે અજિંક્ય રહાણેએ સૌથી વધુ 89 રન નોંધાવ્યા હતા. તેણે 129 બોલમાં 11 ચોગગા અને એક સિક્સર ફટકારી હતી. જ્યારે શાર્દૂલ ઠાકુર 109 બોલમાં છ ચોગ્ગા સાથે 51 રન નોંધાવીને આઉટ થયો હતો. ઓસ્ટ્રેલિયા માટે પેટ કમિન્સે ત્રણ તથા મિચેલ સ્ટાર્ક, સ્કોટ બોલેન્ડ અને કેમેરોન ગ્રીને બે-બે તથા નાથન લાયને એક વિકેટ ઝડપી હતી.