સ્મૃતિ મંધાનાની તોફાની ઇનિંગ
188 રનના ટાર્ગેટનો પીછો કરવા ઉતરેલી ટીમ ઈન્ડિયાને સ્મૃતિ મંધાનાએ શેફાલી વર્મા સાથે મળીને ઝડપી શરૂઆત કરી હતી. બંને વચ્ચે પ્રથમ વિકેટ માટે 52 બોલમાં 76 રનની ભાગીદારી થઈ હતી. શેફાલી (34)ના આઉટ થયા બાદ સ્મૃતિએ પોતાની તોફાની રમત ચાલુ રાખી હતી. તે 49 બોલમાં 79 રનની ઇનિંગ રમીને પેવેલિયન પરત ફરી હતી. તેની ઇનિંગમાં 9 ચોગ્ગા અને 4 છગ્ગાનો સમાવેશ થાય છે. જોકે, કેપ્ટન હરમનપ્રીત કૌર અને જેમિમા રોડ્રિગ્સનું બેટ શાંત રહ્યું હતું.
જ્યારે તે આઉટ થઈ ત્યારે ભારતને ટીમ માટે 21 બોલમાં 40 રનની જરૂર હતી. રિચા ઘોષે ઝડપી રન બનાવ્યા હતા. હીથર ગ્રેહામે 19મી ઓવરમાં 4 રન આપીને મેચને રસપ્રદ બનાવી હતી. છેલ્લી ઓવરમાં ભારતને જીતવા માટે 14 રનની જરૂર હતી. ભારતે છેલ્લા બોલે ચોગ્ગો ફટકારીને મેચ ટાઈ કરી હતી. રિચા 13 બોલમાં 26 રન બનાવીને અણનમ રહી હતી.
મૂની-મેકગ્રાની રેકોર્ડ ભાગીદારી
ઓસ્ટ્રેલિયાએ બેથ મૂની અને તાહલિયા મેકગ્રાની અડધી સદીની મદદથી એક વિકેટે 187 રન બનાવ્યા હતા. મૂની (અણનમ 82) અને તાહલિયા (અણનમ 70)એ બીજી વિકેટ માટે 158 રન જોડ્યા હતા. મૂનીએ તેની 54 બોલની ઇનિંગમાં 13 ચોગ્ગા ફટકાર્યા હતા જ્યારે તાહલિયાએ તેની 51 બોલની ઇનિંગમાં 10 ચોગ્ગા અને એક સિક્સર ફટકારી હતી. મૂની અને તાહલિયાની આ ભાગીદારી ભારત સામે કોઈપણ વિકેટની સૌથી મોટી અને ઓસ્ટ્રેલિયા તરફથી કોઈપણ વિકેટની સૌથી મોટી ભાગીદારી છે.
ભારત તરફથી એકમાત્ર વિકેટ દીપ્તિ શર્માના ખાતામાં ગઈ. ભારતીય સુકાની હરમનપ્રીત કૌરે ટોસ જીતીને ઓસ્ટ્રેલિયાને પહેલા બેટિંગ માટે આમંત્રણ આપ્યું, ત્યારબાદ ટીમે ધમાકેદાર શરૂઆત કરી. એલિસા હીલી (15 બોલમાં 25 રન, પાંચ ચોગ્ગા)એ આક્રમક અભિગમ અપનાવ્યો અને રેણુકા સિંહ પર ત્રણ ચોગ્ગા અને અંજલિ સરવાણીની બોલિગં પર બે ચોગ્ગા ફટકાર્યા. જોકે, એલિસા ચોથી ઓવરમાં દીપ્તિની બોલ પર દેવિકા વૈદ્યના હાથે કેચ આઉટ થઈ ગઈ હતી. આ પછી ભારતીય બોલરોને બિલકુલ વિકેટ મળી ન હતી. મૂની અને મેકગ્રાએ મેદાનની ચારે બાજુ શોર્ટ રમીને રેકોર્ડ બનાવ્યો.