લાયનલ મેસ્સી વર્લ્ડ કપમાં પોતાની અંતિમ મેચ રમી રહ્યો હતો અને તેની પાસે પોતાના દેશ માટે વર્લ્ડ કપ જીતાડવાની અંતિમ તક હતી. અંતે તેણે વર્લ્ડ કપ ટ્રોફી જીતીને તેનું અને તેના દેશવાસીઓનું સપનું પૂર્ણ કર્યું હતું. આર્જેન્ટિના 36 વર્ષ બાદ વર્લ્ડ કપ જીતવામાં સફળ રહ્યું. મેસ્સીએ સાત ગોલ નોંધાવ્યા અને ત્રણ આસિસ્ટ કર્યા હતા. કતારમાં રમાયેલો વર્લ્ડ કપ આરબ દેશમાં રમાયેલો પ્રથમ અને એશિયામાં રમાયેલો બીજો વર્લ્ડ કપ હતો. અગાઉ 2002માં સાઉથ કોરિયામાં વર્લ્ડ કપ રમાયો હતો જે એશિયામાં રમાયેલો પ્રથમ ફૂટબોલ વર્લ્ડ કપ હતો.
આગામી વર્લ્ડ કપ જૂન-જુલાઈ 2026માં રમાશે અને તેમાં વધારે ટીમો હશે. ફિફા વર્લ્ડ કપ 2026માં 48 ટીમો હશે જેમાં 45 ક્વોલિફાઈંગ દેશો અને ત્રણ યજમાન દેશો હશે. હા આગામી વર્લ્ડ કપની યજમાની ત્રણ દેશોમાં થશે. જેમાં અમેરિકા, કેનેડા અને મેક્સિકોનો સમાવેશ થાય છે. ચાર વર્ષ બાદ આ ત્રણેય દેશો સંયુક્ત રીતે ફિફા વર્લ્ડ કપની યજમાની કરશે. 2026ની ટુર્નામેન્ટમાં ત્રણ-ત્રણ ટીમના 16 ગ્રુપ હોઈ શકે છે.
અમેરિકાના 11, કેનેડાના 2 અને મેક્સિકોના 3 શહેરોમાં રમાશે મુકાબલા
ત્રણ દેશો યજમાની કરવાના છે તેમાંથી સૌથી વધુ મુકાબલા અમેરિકામાં રમાશે. અમેરિકામાં એટલાન્ટા, બોસ્ટન, ડલ્લાસ, હ્યુસ્ટન, કેન્સાસ સિટી, લોસ એન્જલસ, માયામી, ન્યૂયોર્ક-ન્યૂજર્સી, ફિલાડેલ્ફિયા, સાન ફ્રાન્સિસ્કો અને સીયાટેલમાં મેચો રમાશે. જ્યારે કેનેડામાં ટોરન્ટો અને વેનકુવરમાં તથા મેક્સિકોમાં ગુઆડાલાજારા, મેક્સિકો સિટી અને મોન્ટેરીમાં મુકાબલા રમાશે.