DRS રિપ્લેમાં પોતાને દેખાડતા રોષે ભરાયો રોહિત શર્મા
શનિવારે પોતાના બીજા દાવમાં ઓસ્ટ્રેલિયાએ 17 ઓવરમાં 52 રન નોંધાવ્યા હતા પરંતુ તેણે પોતાની ચાર વિકેટ ગુમાવી દીધી હતી. 18મી ઓવર સ્પિનર રવિચંદ્રન અશ્વિને કરી હતી. જેનો પ્રથમ બોલ બેટર પીટર હેન્ડસ્કોબના પેડ પર અડ્યો હતો. જેના કારણે ભારતીય ટીમે એલબીડબ્લ્યુની અપીલ કરી હતી. જોકે, અમ્પાયરે અપીલ નકારી દીધી હતી અને હેન્ડસ્કોબને નોટઆઉટ જાહેર કર્યો હતો. જેની સામે ભારતે રિવ્યુ લીધો હતો. ડીઆરએસ દરમિયાન કેમેરામેને કેમેરો રોહિત શર્મા પર ફોકસ કર્યો હતો અને સ્ટેડિયમની જાયન્ટ સ્ક્રીન પર રોહિત દેખાતો હતો. જેના કારણે રોહિત રોષે ભરાયો હતો. તેણે બ્રોડકાસ્ટર્સ તરફ ઈશારો કર્યો હતો કે મને કેમ દેખાડે છે, ડીઆરએસ રિપ્લે દેખાડ. આ ઘટનાનો વિડીયો હાલમાં સોશિયલ મીડિયા પર વાયરલ થયો છે.
જાડેજા પ્લેયર ઓફ ધ મેચ, અશ્વિને પણ મચાવ્યો તરખાટ
આ ટેસ્ટ ખાસ કરીને રવિન્દ્ર જાડેજા માટે યાદગાર બની ગઈ છે. ઘૂંટણની સર્જરી કરાવ્યા બાદ જાડેજાએ આ મેચ દ્વારા આંતરરાષ્ટ્રીય ક્રિકેટમાં કમબેક કર્યું હતું. જેમાં તેણે બોલિંગ અને બેટિંગ બંનેમાં દમદાર પ્રદર્શન કર્યું હતું અને તે ભારતની જીતનો હીરો રહ્યો હતો. જાડેજાને પ્લેયર ઓફ ધ મેચ જાહેર કરાયો હતો. જાડેજાએ પ્રથમ દાવમાં પાંચ વિકેટ ઝડપી હતી જ્યારે બીજા દાવમાં તેને બે સફળતા મળી હતી. આ ઉપરાંત તેણે અડધી સદી ફટકારતા 70 રનની ઈનિંગ્સ પણ રમી હતી. બીજી તરફ તેના સાથી સ્પિનર અશ્વિને પણ બોલિંગમાં કમાલ કરી હતી. અશ્વિને પ્રથમ દાવમાં ત્રણ અને બીજા દાવમાં પાંચ વિકેટ પોતાના નામે કરી હતી.
ત્રણ દિવસમાં જ પૂરી થઈ પ્રથમ ટેસ્ટ, ભારતનો એક ઈનિંગ્સ અને 132 રને વિજય
ભારત અને ઓસ્ટ્રેલિયા વચ્ચે રમાયેલી પ્રથમ ટેસ્ટ ત્રણ દિવસમાં જ પૂરી થઈ ગઈ હતી. જેમાં સ્પિનર્સનો દબદબો રહ્યો હતો. ભારત તરફથી જાડેજા અને અશ્વિનનું પ્રદર્શન ઘાતક રહ્યું હતું. જ્યારે ઓસ્ટ્રેલિયા માટે પોતાની કારકિર્દીની પ્રથમ ટેસ્ટ રમી રહેલા સ્પિનર ટોડ મર્ફીએ ઘાતક પ્રદર્શન કર્યું હતું. ઓસ્ટ્રેલિયાએ ટોસ જીતીને પ્રથમ બેટિંગનો નિર્ણય કર્યો હતો. ઓસ્ટ્રેલિયાનો પ્રથમ દાવ 177 રનમાં સમેટાઈ ગયો હતો. પ્રથમ દાવમાં ઓસ્ટ્રેલિયા માટે માર્નસ લાબુશેને સૌથી વધુ 49 રન નોંધાવ્યા હતા. જ્યારે ભારત માટે જાડેજાએ પાંચ તથા અશ્વિને ત્રણ વિકેટ ઝડપી હતી.
ભારતે પ્રથમ દાવમાં 400 રનનો સ્કોર નોંધાવીને 223 રનની સરસાઈ મેળવી લીધી હતી. ભારત માટે કેપ્ટન રોહિત શર્મા 120 રનની શાનદાર ઈનિંગ્સ રમી હતી. આ ઉપરાંત રવિન્દ્ર જાડેજાએ 70 અને અક્ષર પટેલે 84 રન ફટકાર્યા હતા. ઓસ્ટ્રેલિયાના નવોદિત સ્પિનર ટોડ મર્ફીએ પોતાની બોલિંગથી ક્રિકેટ દિગ્ગજોને પ્રભાવિત કર્યા હતા. તેણે 47 ઓવરમાં 124 રન આપીને સાત વિકેટ પોતાના નામે કરી હતી. જોકે, બીજા દાવમાં ઓસ્ટ્રેલિયાની બેટિંગ કંગાળ રહી હતી. કાંગારૂ ટીમ 32.3 ઓવરમાં 91 રનમાં તંબૂ ભેગી થઈ ગઈ હતી. ઓસ્ટ્રેલિયા માટે સ્ટીવ સ્મિથે સૌથી વધુ અણનમ 25 રન નોંધાવ્યા હતા. ભારત માટે અશ્વિને 12 ઓવરમાં 37 રન આપીને પાંચ વિકેટ ઝડપી હતી. જ્યારે જાડેજા અને શમીએ બે-બે વિકેટ પોતાના નામે કરી હતી.