બોલ ચમકાવવા માટે લાળના ઉપયોગ પર કાયમી પ્રતિબંધ
અગાઉ આઈસીસી દ્વારા કોરોનાને ધ્યાનમાં રાખીને તથા ક્રિકેટના નિયમોના કસ્ટડીયન મેરીલેબોન ક્રિકેટ ક્લબ (MCC) દ્વારા બોલ ચમકાવવા માટે લાળના ઉપયોગ પર પ્રતિબંધ મૂક્યો હતો. જોકે, હવે 2022 કોડના એમેન્ડમેન્ડ્સમાં તેના પર કાયમી પ્રતિબંધ મૂકી દેવામાં આવ્યો છે. આઈસીસી એ જાહેર કરેલા નિવેદનમાં જણાવ્યું હતું કે, કોવિડને લગતી સાવચેતાની કારણે બોલ પર લાળ લગાવવા પર છેલ્લા બે વર્ષથી પ્રતિબંધ લગાવવામાં આવ્યો હતો અને હવે આ પ્રતિબંધને કાયમી કરવામાં આવ્યો છે.
બેટર જે સ્થાને આઉટ થયો હોય તે સ્થાને જ નવો બેટર આવશે
હાલમાં ક્રિકેટમાં જ્યારે કોઈ બેટર કેચ આઉટ થાય છે અને આ દરમિયાન તે એક રન લઈ લે છે તો નવો બેટર નોન-સ્ટ્રાઈક એન્ડ પર આવે છે. પરંતુ હવે આ નિયમમાં પણ ફેરફાર કરવામાં આવ્યો છે. આઈસીસી એ જણાવ્યું છે કે, જ્યારે બેટર કેચ આઉટ થાય છે ત્યારે તેના સ્થાને આવનારો નવો બેટર એ સ્થાને જ રહેશે જ્યાં બેટર આઉટ થયો હશે. ભલે કેચ દરમિયાન બેટર્સ ક્રોસ થઈ ગયા હશે કે નહીં.
બે મિનિટની અંદર નવા બેટરે સ્ટ્રાઈક લઈ લેવી પડશે
ક્રિકેટનું સંચાલન કરતી સર્વોચ્ચ સંસ્થાએ તે પણ જણાવ્યું છે કે નવા આવનાર બેટરે સ્ટ્રાઈક લેવા માટે બે મિનિટમાં તૈયાર થઈ જવું પડશે. ટેસ્ટ અને વન-ડેમાં બેટરે બે મિનિટની અંદર સ્ટ્રાઈક લેવા માટે તૈયાર રહેવું પડશે. જ્યારે ટી20માં હાલનો જે નિયમ છે તે પ્રમાણે 90 સેકન્ડ્સમાં જ સ્ટ્રાઈક લઈ લેવી પડશે.
નોન-સ્ટ્રાઈકર્સ એન્ડ રન આઉટ હવે કાયદેસર બનશે
બોલર જ્યારે બોલ ફેંકવાની શરૂઆત કરે અને બોલ ફેંકે તે પહેલા નોન-સ્ટ્રાઈક એન્ડ પરનો બેટર ક્રિઝની બહાર હોય ત્યારે બોલર તેને રન આઉટ કરે ત્યારે વિવાદ થતો હતો. તેને ‘અનફેર પ્લે’ ગણવામાં આવતું અથવા તો સ્પોર્ટ્સમેન સ્પિરિટની વિરુદ્ધ ગણવામાં આવતું. જોકે, આઈસીસી એ હવે આને ‘રન આઉટ’ સેક્શનમાં સામેલ કરી લીધો છે. આવા રન આઉટને માંકડિંગ રન આઉટ કહેવામાં આવે છે. આઈપીએલમાં રવિચંદ્રન અશ્વિને જોસ બટલરને આ રીતે રન આઉટ કર્યો હતો અને ત્યારબાદ ઘણો મોટો વિવાદ થયો હતો. જોકે, અશ્વિને આને યોગ્ય રીતે આઉટ ગણાવ્યો હતો. જોકે, હવે ક્રિકેટમાં આ વિવાદને સ્થાન રહેશે નહીં.
પ્લેઈંગ કન્ડિશનમાં પણ ફેરફાર
બોલરના રનઅપ દરમિયાન જો ફિલ્ડિંગ ટીમ કોઈ અયોગ્ય રીત અપનાવે છે તો અમ્પાયર તેને ‘ડેડ બોલ’ જાહેર કરશે અને બોલિંગ ટીમને પેનલ્ટી આપતા બેટિંગ ટીમને પાંચ રન આપશે. બીજા એક ફેરફારમાં સ્ટ્રાઈક પર રહેલો બેટર આગળ આવે અને તે દરમિયાન બોલર તેને રન આઉટ કરવા માટે થ્રો કરે તો હવે તેને ગણનામાં લેવામાં આવશે નહીં. અગાઉ બોલ જ્યારે તેની ડિલિવરી સ્ટ્રાઈડમાં આવે તે પહેલા સ્ટ્રાઈક પર રહેલો બેટર આગળ વધે ત્યારે બોલર તેને રન આઉટ કરવા માટે થ્રો કરી શકતો હતો. હવેથી તેને ડેડ બોલ ગણવામાં આવશે.
અન્ય એક મોટા અને મહત્વના નિયમમાં ફેરફાર કરવામાં આવ્યો છે. આઈસીસી એ કહ્યું છે કે, ટી20 ક્રિકેટમાં ઓવર રેટ ધીમો હોવાના કારણે 30 યાર્ડના ઘેરાની બહાર એક ફિલ્ડર ઓછો રાખવાનો નિયમ હવે વન-ડેમાં પણ અમલી બનાવવામાં આવશે. આઈસીસી એક કહ્યું હતું કે, ટી20 ક્રિકેટમાં સ્લો ઓવર રેટ બદલ કરવામાં આવતા દંડને હવે વન-ડેમાં પણ લાગુ કરવામાં આવશે. જોકે, આઈસીસી આ નિયમ મેન્સ વર્લ્ડ કપ સુપર લીગ 2023 બાદ અમલી બનાવશે.