yashasvi jaiswal, યશસ્વી જયસ્વાલે એવો ઈતિહાસ રચ્યો, જે 62 વર્ષના ઈતિહાસમાં કોઈ ભારતીય બેટર નોંધાવી શક્યો નહીં – yashasvi jaiswal becomes first player in 63 years of irani cup to register this record

મુંબઈના યુવા બેટ્સમેન યશસ્વી જયસ્વાલના બેટમાંથી હાલમાં રનનો વરસાદ થઈ રહ્યો છે. યશસ્વીએ રેસ્ટ ઓફ ઈન્ડિયા તરફથી રમતા ઈરાની કપની પ્રથમ ઈનિંગ્સમાં બેવડી સદી ફટકારી હતી. તેણે 259 બોલમાં 213 રનની આક્રમક ઈનિંગ્સ રમી હતી. જેમાં તેણે 30 ચોગ્ગા અને 3 છગ્ગા ફટકાર્યા હતા. હવે તેણે ઈરાની કપની ડેબ્યૂ મેચની બીજી ઈનિંગ્સમાં પણ સદી ફટકારી છે. અન્ય બેટર્સ રન નોંધાવવા માટે સંઘર્ષ કરી રહ્યા છે ત્યારે યશસ્વીએ 104 બોલમાં પોતાની સદી પૂરી કરી હતી.

ઈરાની કપમાં ઈતિહાસ રચાયો
યશસ્વી જયસ્વાલ ઈરાની કપની એક જ મેચમાં બેવડી સદી અને સદી ફટકારનાર પ્રથમ બેટ્સમેન બની ગયો છે. તેના પહેલા શિખર ધવન અને હનુમા વિહારીએ બંને ઇનિંગ્સમાં સદી ફટકારી હતી. પરંતુ કોઈ બેટર બેવડી સદી અને એક સદી ફટકારી શક્યો ન હતો. આ સાથે 21 વર્ષીય યશસ્વી ઈરાની કપની મેચમાં સૌથી વધુ રન ફટકારનારો ખેલાડી પણ બની ગયો છે. આ પહેલા આ રેકોર્ડ શિખર ધવન (332 રન)ના નામે હતો. આ પહેલા ધવન સિવાય કોઈ બેટર 300 રનના આંકડાને સ્પર્શી શક્યો નહોતો.

યશસ્વી 11મો ભારતીય ખેલાડી બન્યો
જયસ્વાલ ફર્સ્ટ ક્લાસ મેચમાં બેવડી સદી અને એક જ મેચમાં સદી ફટકારનાર 11મો ભારતીય છે. કે.એસ. દિલીપ સિંહજી 1929માં ઈંગ્લેન્ડમાં કાઉન્ટી ચેમ્પિયનશિપમાં સસેક્સ તરફથી રમતી વખતે આ સિદ્ધિ મેળવનાર પ્રથમ ભારતીય બન્યા હતા. સુનીલ ગાવસ્કર આંતરરાષ્ટ્રીય ક્રિકેટમાં આ સિદ્ધિ નોંધાવનાર એકમાત્ર ભારતીય છે. સુનીલ ગાવસ્કરે 1971માં વેસ્ટ ઈન્ડિઝના પ્રવાસ દરમિયાન આ સિદ્ધિ નોંધાવી હતી.

15 મેચમાં ફટકારી 9 સદી
યશસ્વી જયસ્વાલની આ માત્ર 15મી ફર્સ્ટ ક્લાસ મેચ છે અને તેમાં તેણે 9 સદી ફટકારી દીધી છે. 2019માં યશસ્વીએ છત્તીસગઢ સામે મુંબઈ માટે ફર્સ્ટ ક્લાસ ક્રિકેટમાં ડેબ્યુ કર્યું હતું. તેને 2020 અંડર-19 વર્લ્ડ કપમાં સૌથી વધુ રન બનાવવા બદલ પ્લેયર ઓફ ધ ટુર્નામેન્ટનો એવોર્ડ મળ્યો હતો. તેના નામે 32 લિસ્ટ-A મેચોમાં પાંચ સદી છે. જેમાં 203 રનની ઈનિંગ્સ પણ સામેલ છે.