વિરાટ કોહલીની 29મી ટેસ્ટ સદી
ટેસ્ટ ક્રિકેટમાં વિરાટ કોહલીની આ 29મી સદી છે. આ સાથે જ આંતરરાષ્ટ્રીય ક્રિકેટમાં તેણે 76મી વખત 100 રનના આંકડાને સ્પર્શ કર્યો છે. જ્યારે તે ક્રિઝ પર આવ્યો ત્યારે બેટિંગ કરવી સરળ ન હતી. ભારતે પહેલા દિવસે બીજા સેશનમાં 4 વિકેટ ગુમાવી હતી પરંતુ વિરાટ કોહલીએ એક છેડો જાળવી રાખ્યો હતો. સામે છેડે તેને રવિન્દ્ર જાડેજાનો સારો સાથ મળ્યો અને વિરાટ કોહલીએ બીજા દિવસે પ્રથમ સેશનમાં પોતાની સદી પૂરી કરી.
20 બોલમાં કોહલીએ ખાતું ખોલાવ્યું
20 બોલમાં ખાતું ખોલાવનાર વિરાટ કોહલીએ 180 બોલમાં 10 ચોગ્ગાની મદદથી પોતાની સદી પૂરી કરી હતી. તેણે ગેબ્રિયલના બોલ પર ચોગ્ગો ફટકારીને પોતાની સદી પૂરી કરી હતી. આંતરરાષ્ટ્રીય ક્રિકેટમાં વિરાટ કોહલીની આ 500મી મેચ છે. તેણે 2008માં આંતરરાષ્ટ્રીય ક્રિકેટમાં ડેબ્યૂ કર્યું હતું. વિરાટ કોહલીએ 2011માં વેસ્ટ ઈન્ડિઝમાં જ ટેસ્ટ ડેબ્યુ કર્યું હતું. કોહલી 206 બોલમાં 121 રન બનાવીને રનઆઉટ થયો હતો. આ ઈનિંગ્સમાં તેણે 11 ચોગ્ગા ફટકાર્યા હતા.
કોહલીએ સર ડોન બ્રેડમેનની બરાબરી કરી
ટેસ્ટ ક્રિકેટમાં સદી ફટકારવાના મામલે વિરાટ કોહલીએ ઓસ્ટ્રેલિયાના મહાન સર ડોન બ્રેડમેનની બરાબરી કરી લીધી છે. સક્રિય ખેલાડીઓમાં માત્ર સ્ટીવ સ્મિથ અને જો રૂટ જ વિરાટ કોહલી કરતા વધુ સદીઓ ધરાવે છે. ઓસ્ટ્રેલિયન સ્ટાર સ્ટિવ સ્મિથે ટેસ્ટમાં અત્યાર સુધી 32 સદી ફટકારી છે. જ્યારે ઈંગ્લેન્ડ જો રૂટના નામે 30 સદી છે. ભારતીય બેટ્સમેનોમાં સચિન તેંડુલકર, રાહુલ દ્રવિડ અને સુનીલ ગાવસ્કર વિરાટ કરતા વધુ ટેસ્ટ સદી ધરાવે છે.