વેસ્ટ ઈન્ડિઝ માટે 103 ટેસ્ટ, 301 વન-ડે અને 79 ટી20 રમી ચૂકેલા વિસ્ફોટક બેટર ક્રિસ ગેઈલે અમારા સહયોગી ટાઈમ્સઓફઈન્ડિયા.કોમ સાથે વર્લ્ડ કપ અંગે વાતચીત કરી હતી. તેણે કઈ ટીમ ટાઈટલ જીતવા માટે પ્રબળ દાવેદાર છે તે અંગે કહ્યું હતું કે તે કોઈ ટીમને ફેવરિટ કહી શકે તેમ નથી. પરંતુ સેમિફાઈનલમાં કઈ ટીમો પહોંચશે તે અંગે તેણે વાતચીત કરી હતી. તેણે કહ્યું હતું કે, ભારત, પાકિસ્તાન, ઈંગ્લેન્ડ અને ઓસ્ટ્રેલિયા આ ચાર ટીમો સેમિફાઈનલમાં પહોંચી શકે છે.
2011માં ભારતીય ટીમ વર્લ્ડ ચેમ્પિયન બની હતી અને ત્યારે ખેલાડીઓએ કહ્યું હતું કે આ સચિન તેંડુલકર માટે છે. શું આવી જ લાગણી આ વખતે વિરાટ કોહલી માટે હશે?
આ પ્રશ્નના જવાબમાં ક્રિસ ગેઈલે જણાવ્યું હતું કે, વિરાટ કોહલી હજી વધુ એક વર્લ્ડ કપ રમી શકે છે. મને નથી લાગતું કે આ વર્લ્ડ કપ કોહલીનો અંતિમ વર્લ્ડ કપ હશે. મારું માનવું છે કે તે હજી એક વર્લ્ડ કપ રમી શકે છે. ભારતીય ટીમ ફેવરિટ છે કેમ કે તે ઘરઆંગણે રમી રહી છે. તેથી ટુર્નામેન્ટ ઘણી રસપ્રદ બની રહેશે. ભારતીય ટીમ ઘરઆંગણે હંમેશા ફેવરિટ રહ્યું છે. તેથી ટીમ પર દબાણ પણ રહેશે. ગેઈલે જણાવ્યું હતું કે ભારતીય ટીમ માટે જસપ્રિત બુમરાહ અને સૂર્યકુમાર યાદવ બે મહત્વના ખેલાડી બની રહેશે.
કોહલી સાથે પોતાના સંબંધ અંગે વાત કરતા ગેઈલે જણાવ્યું હતું કે કોહલી જેવા ખેલાડી સાથે ડ્રેસિંગ રૂમ શેર કરવો અને તેની સાથે રમવું ઘણું શાનદાર રહ્યું. અમે આઈપીએલમાં રોયલ ચેલેન્જર્સ બેંગલોર માટે ઘણી બધી સદીની ભાગીદારી નોંધાવી છે. અમારી વચ્ચે ઘણું સારું બોન્ડિંગ છે. તે ઘણો સારો વ્યક્તિ છે. શું પોતે આઈપીએલમાં કોચિંગ આપશે તે અંગે પૂછતાં ગેઈલે હસતા હસતા કહ્યું હતું કે મને નથી લાગતું કે હું આ બધું મેનેજ કરી શકું છું. જોઈએ ભવિષ્યમાં શું થાય છે.