આ વિડીયોમાં કોહલીના હોટલ રૂમની અંદરનું દ્રશ્ય છે જેમાં તેનો બધો વ્યક્તિગત સામાન પણ જોવા મળે છે. વિરાટ કોહલીએ આ ઘટના ક્યારે બની હતી તેનો ખુલાસો કર્યો નથી પરંતુ કેટલાક રિપોર્ટ પ્રમાણે ટીમ ઈન્ડિયા ઓસ્ટ્રેલિયા પહોંચી તેના થોડા સમય બાદનો આ વિડીયો છે. આ વિડીયોમાં જોઈ શકાય છે કે વ્યક્તિ વિરાટ કોહલીના રૂમ તરફ જાય છે અને દરવાજા અને કપબોર્ડ્સ ખોલે છે. આ વિડીયો જોઈને તમામ લોકોને આઘાત લાગ્યો છે.
આ ઘટના બાદ હોટલ સવાલોમાં ઘેરાઈ છે. હોટલે જણાવ્યું હતું કે, આ ઘટનામાં જે સામેલ છે તેને હોટલમાંથી હટાવી દેવામાં આવ્યો છે. જોકે, અહીં કેટલાક ગંભીર સવાલો પણ ઊભા થયા છે. (1) શું આ ઘટનામાં ફક્ત હોટલના સ્ટાફના સભ્યો જ સામેલ છે? (2) હોટલ સ્ટાફ આ પ્રકારની પ્રવૃત્તિઓમાં સામેલ ન થાય તે માટે હોટલ દ્વારા શું તકેદારી રાકવામાં આવે છે? (3) આ ઘટના બાદ ટીમ ઈન્ડિયાના સુરક્ષા અધિકારીઓએ કયા પગલા લીધા હતા? (4) આવી ઘટના બીજી વખત ન બને તે માટે શું કરી શકાય?
અહીં તે સમજવું જરૂરી છે કે આ ફક્ત પ્રાઈવસી ભંગનો મામલો નથી પરંતુ સુરક્ષામાં રહેલી ગંભીર ચૂક પણ છે. વ્યક્તિની પ્રાઈવસી સૌથી અગત્યની વાત છે ભલે તે સેલિબ્રિટી હોય કે નહીં હોય. વિશ્વના અન્ય ક્રિકેટર્સ કરતાં ભારતીય ક્રિકેટર્સને કદાચ સૌથી વધારે સુરક્ષા પૂરી પાડવામાં આવે છે. જે હોટલ અને ફ્લોર્સ પર ટીમ ઈન્ડિયા રોકાતી હોય છે ત્યાં લોકોના ઉપયોગ માટે મર્યાદિત કરવામાં આવે છે.
વિરાટ કોહલીએ આ ઘટના અંગે કહ્યું હતું કે, હું સમજુ છું કે સમર્થકો પોતાના ફેવરિટ ખેલાડીઓને મળવા માટે આતુર અને ખુશ હોય છે અને હું હંમેશા આ વાતની પ્રશંસા કરું છું. પોતાની ઈન્ટાગ્રામ પોસ્ટને તેણે લખ્યું હતું કે, પરંતુ આ વિડીયોથી હું નિરાશ થયો છું અને મારી પ્રાઈવસી અંગે પણ ચિંતિત બન્યો છું. જો મને મારી હોટલ રૂમમાં પ્રાઈવસી ન મળતી હોય તો પછી હું મારી વ્યક્તિગત પ્રાઈવસીને કઈ જગ્યાએ મેળવી શકું? હું આ પ્રકારના ફેન્સથી ખુશ નતી અને આ મારી પ્રાઈવસમાં ભંગ છે. મહેરબાની કરીને લોકોની પ્રાઈવસીનું સન્માન કરો અને મનોરંજન માટે તેને કોમોડિટી તરીકે ના જુઓ.
ઓસ્ટ્રેલિયન ક્રિકેટર ડેવિડ વોર્નરે પણ આ ઘટના અંગે ટ્વિટ કરી હતી કે, આ વાહિયાત છે અને કોઈ પણ રીતે ચલાવી લેવાય નહીં. ઈન્ટરનેશનલ ક્રિકેટ કાઉન્સિલે (આઈસીસી) જણાવ્યું હતું કે, કોહલીની પ્રાઈવસીમાં ભંગ થવાની ઘટના અત્યંત નિરાશાજનક છે. અમે ટુર્નામેન્ટ સાથે જોડાયેલી હોટલ અને પૂરી પાડવામાં આવતી સુરક્ષા સાથે સતત કામ કરી રહ્યા છીએ. ખેલાડીઓની પ્રાઈવસી અમારા માટે સર્વોપરી છે.