34 વર્ષીય કોહલી હાલના સમયમાં પોતાની ઈનિંગ્સને ધીમે ધીમે પરંતુ દ્રઢતાથી આગળ ધપાવે છે અને એક વખત સેટ થઈ ગયા પછી બોલર્સ માટે માથાનો દુઃખાવો બની રહ્યો છે. જોકે, એક બાબત તેની નબળાઈ બનીને સામે આવી છે અને તે છે કે તે ક્વોલિટી સ્પિન બોલિંગ સામે તે નબળો જોવા મળ્યો છે. જોકે, હજી સુધી આ વધારે જોખમી બન્યું નથી પરંતુ ટીમ મેનેજમેન્ટને ચોક્કસથી આ વાત ખટકી રહી હતી. ગત વર્ષે યુએઈમાં રમાયેલા એશિયા કપ દ્વારા કોહલીએ પોતાનું ફોર્મ મેળવ્યું છે પરંતુ તેને સ્પિન બોલિંગનો સામનો કરવામાં થોડી મુશ્કેલી નડી રહી છે.
ન્યૂઝીલેન્ડ સામે રમાઈ રહેલી સિરીઝ બાદ ભારત ઘરઆંગણે ઓસ્ટ્રેલિયા સામે ચાર ટેસ્ટ મેચ મહત્વની સિરીઝ રમવાનું છે. આ સિરીઝની મેચો નાગપુર, દિલ્હી, ધરમશાલા અને અમદાવાદમાં રમાવાની છે. આ ચારેયની પિચ મોટા ભાગે સ્પિનર્સ માટે મદદરૂપ હોય છે. તેવામાં કોહલીએ ઓસ્ટ્રેલિયા સામેની સિરીઝ પહેલા પોતાની સ્પિન સામેની નબળાઈ પર કામ કરવું પડશે. ભારતીય પિચોને ધ્યાનમાં રાખતાં જ ઓસ્ટ્રેલિયાએ ટીમમાં ચાર સ્પિનર્સ સામેલ કર્યા છે. ઓસ્ટ્રેલિયન ટીમમાં અનુભવી નાથન લાયન છે. આ ઉપરાંત એશ્ટન અગર, મિચેલ સ્વેપસન અને ટોડ મર્ફીને પણ સામેલ કરવામાં આવ્યા છે.
ન્યૂઝીલેન્ડ સામે રમાઈ રહેલી સિરીઝની પ્રથમ બે મેચમાં કોહલી સ્પિનર મિચેલ સેન્ટનરનો શિકાર બન્યો હતો. કોહલી જ્યારે પોતાની કારકિર્દીના સર્વોચ્ચ ફોર્મમાં હતો ત્યારે ભલભલા બોલર્સ તેને રોકવામાં નિષ્ફળ રહ્યા હતા. કદાચ હાલના સમયમાં સ્પિનર્સ તેની સામે વધારે આત્મવિશ્વાસથી બોલિંગ કરી રહ્યા છે અને પિચ પરથી પણ તેમને મદદ મળી રહી છે. એક ભૂતપૂર્વ ભારતીય ખેલાડીએ જણાવ્યું હતું કે, આશ્ચર્યજનક વાત છે કે એક ભારતીય બેટર તરીકે કોહલી સ્પિન વિરુદ્ધ પોતાના પગનો વધારે ઉપયોગ કરી રહ્યો નથી. તેથી કોહલીએ ઓસ્ટ્રેલિયા સામેની સિરીઝ પહેલા પોતાની આ નબળાઈને દૂર કરવાની જરૂર છે.