વિરાટ કોહલી સાથેની મુલાકાતની તસવીર શેર કરવાની સાથે અશનીર ગ્રોવરે પોતાના ટ્વિટર હેન્ડલ પર લખ્યું કે, ‘બેન સ્ટોક્સ માટે એક સરખું પેશન રાખનારા દિલ્હીના છોકરા શું ચર્ચા કરી શકે? કોહલીને નાગપુર મેચ માટે શુભકામનાઓ.’ ઉલ્લેખનીય છે કે, અશનીર ગ્રોવર પણ કોહલીની જેમ દિલ્હી સાથે સંબંધ ધરાવે છે. તો, ઓલરાઉન્ડર બેન સ્ટોક્સ હાલ ઈંગ્લેન્ડની ટેસ્ટ ટીમનો કેપ્ટન છે.
ઓસ્ટ્રેલિયા સામે મોહાલીમાં રમાયેલી પહેલી ટી-20 મેચમાં વિરાટ કોહલી કંઈ ખાસ કરી શક્યો ન હતો અને માત્ર બે રન બનાવી આઉટ થઈ ગયો હતો. ભારતને એ મેચમાં ઓસ્ટ્રેલિયાએ 4 વિકેટે હરાવ્યું હતું. એ મેચમાં ટોસ હારી પહેલા બેટિંગમાં ઉતરેલી ટીમ ઈન્ડિયાએ હાર્દિક પંડ્યાના અણનમ 71 રનની મદદથી 208 રન બનાવ્યા હતા. જવાબમાં ઓસ્ટ્રેલિયાની ટીમે કેમરન ગ્રીનની અડધી સદીની મદદથી ટાર્ગેટ પાર કરી લીધો હતો.
ભારત-પે સાથેના વિવાદથી ચર્ચામાં હતા અશનીર ગ્રોવર
અશનીર ગ્રોવર તાજેતરમાં ભારત-પે સાથે થયેલા વિવાદને પગલે ઘણા ચર્ચામાં રહ્યા હતા. આ વિવાદને પગલે તેમણે આ વર્ષે માર્ચમાં કંપની છોડી દીધી હતી. તેમણે કંપનીના મેનેજમેન્ટ ખાસ કરીને સીઈઓ સુહૈલ સમીર અને ચેરમને રજનીશ કુમાર સામે અપમાનજનક વ્યવહાર કરવાનો આરોપ લગાવ્યો હતો. તો, ભારત-પેના મેનેજમેન્ટે અશનીર ગ્રોવર અને તેમના પરિવાર પર કંપનીમાં નાણાકીય ગરબડ કરવાનો આરોપ લગાવ્યો હતો.
કોહલી પાસે સારા પ્રદર્શનની આશા
વિરાટ કોહલીનો ઓસ્ટ્રેલિયા સામે ટી-20 ઈન્ટરનેશનલમાં શાનદાર રેકોર્ડ રહ્યો છે. કોહલીએ અત્યાર સુધી રમેલી 20 મેચમાં 55.38ની સરેરાશથી 720 રન બનાવ્યા છે. આ દરમિયાન તેણે 7 અડધી સદી ફટકારી છે. ઓસ્ટ્રેલિયા સામે કોહલીનો બેસ્ટ સ્કોર અણનમ 90 રન રહ્યો છે. એવામાં બીજી ટી-20માં તે સારું પ્રદર્શન કરશે તેવી ફેન્સ આશા રાખી રહ્યા છે.
Read Latest Sports News And Gujarati News