કેવું રહેશે સિડનીનું હવામાન
ટી20 વર્લ્ડ કપમાં અત્યાર સુધી બે મેચ વરસાદના કારણે રદ કરવામાં આવી છે. આ ઉપરાંત કેટલીક મેચમાં પણ વરસાદનું વિઘ્ન નડ્યું છે. સિડનીમાં ગુરૂવારે વરસાદની આગાહી વ્યક્ત કરવામાં આવી છે. દિવસમાં વરસાદની સંભાવના 80 ટકા છે. ભારત અને નેધરલેન્ડ્સ વચ્ચેનો મુકાબલો સ્થાનિક સમય પ્રમાણે સાંજે છ વાગ્યે રમાશે. તે સમયે વરસાદની શક્યતા 10 ટકાથી પણ ઓછી છે. જોકે, દિવસના સમયે વધારે વરસાદ પડ્યો તો સાંજે મેચ રમાવવી મુશ્કેલ બની જશે. આ સાથે જ 20 કિમી પ્રતિ કલાકની ઝડપે હવા ચાલી શકે છે. હ્યુમિડિટી 60 ટકા સુધી રહી શકે છે.
હાઈસ્કોરિંગ મેચ થઈ શકે છે
સિડની ક્રિકેટ ગ્રાઉન્ડ પર અત્યાર સુધી ટી20 વર્લ્ડ કપ 2022માં એક જ મેચ રમાઈ છે. તે મેચમાં ન્યૂઝીલેન્ડે યજમાન ઓસ્ટ્રેલિયાને 89 રનના મોટા અંતરથી પરાજય આપ્યો હતો. પિચ બેટિંગ માટે આદર્શ હતી. આ મેચમાં પણ પિચ તેવી જ રહેવાની આશા છે. તેથી ભારત અને નેધરલેન્ડ્સ વચ્ચે હાઈસ્કોરિંગ મેચ થઈ શકે છે.
ભારતનો રેકોર્ડ પણ છે શાનદાર
ભારતીય ટીમે સિડની ક્રિકેટ ગ્રાઉન્ડમાં અત્યાર સુધી ચાર આંતરરાષ્ટ્રીય ટી20 મેચ રમી છે. આ ચારમાંથી ભારતીય ટીમ ત્રણ મેચ જીતી છે જ્યારે એક મેચમાં તેને પરાજયનો સામનો કરવો પડ્યો છે. આ મેદાન પર ભારતનો સર્વોચ્ચ સ્કોર 200 રનનો રહ્યો છે. 2020માં ટીમ ઈન્ડિયાએ અહીં ઓસ્ટ્રેલિયા વિરુદ્ધ 195 રનના લક્ષ્યાંકને પાર પાડીને મેચ જીતી લીધી હતી.
ભારતીય ટીમઃ રોહિત શર્મા (સુકાની), લોકેશ રાહુલ, વિરાટ કોહલી, સૂર્યકુમાર યાદવ, હાર્દિક પંડ્યા, દિનેશ કાર્તિક, અક્ષર પટેલ, રવિચંદ્રન અશ્વિન, યુઝવેન્દ્ર ચહલ, ભુવનેશ્વર કુમાર, મોહમ્મદ શમી, અર્શદીપ સિંહ, દીપક હુડ્ડા, હર્ષલ પટેલ, રિશભ પંત.
નેધરલેન્ડ્સની ટીમઃ સ્કોટ એડવર્ડ્સ (સુકાની), કોલિન એકરમેન, ટોમ કૂપર, બાસ ડી લીડે, બ્રેન્ડન ગ્લોવર, ફ્રેડ ક્લાસેન, સ્ટીફન માયબર્ગ, વિક્રમજીત સિંહ, તેજા નિદિમાનુર, મેક્સ ઓ ડાઉડ, ટિમ પ્રિંગલ, રીલોફ વાન ડેર મર્વ, ટિમ વાન ડેર ગુગટેન, લોગાન વાન બીક, પોલ વાન મીકરેન, શારિજ અહેમદ.