સ્કોટલેન્ડ માટે ઓપનર મુનસેએ ધમાકેદાર બેટિંગ કરી હતી. મુનસે અને માઈકલ જોન્સની ઓપનિંગ જોડીએ ટીમને શાનદાર શરૂઆત અપાવી હતી. આ જોડીએ પ્રથમ વિકેટ માટે 6.2 ઓવરમાં 55 રનની ભાગીદારી નોંધાવી હતી. જોન્સ 20 રન નોંધાવીને આઉટ થયો હતો. સુકાની બેરિંગ્ટને 16 તથા મેકલીયોડે 14 બોલમાં 23 રનનું યોગદાન આપ્યું હતું. સ્કોટલેન્ડ માટે મુનસેએ 53 બોલમાં 9 ચોગ્ગા સાથે 66 રનની અણનમ ઈનિંગ્સ રમી હતી. વેસ્ટ ઈન્ડિઝ માટે અલઝારી જોસેફ અને જેસન હોલ્ડરે બે-બે વિકેટ ઝડપી હતી. જ્યારે ઓડેન સ્મિથને એક સફળતા મળી હતી.
161 રનના લક્ષ્યાંકને બચાવવામાં સ્કોટલેન્ડે સફળતા મેળી હતી અને તમામ બોલર્સે લાજવાબ પ્રદર્શન કર્યું હતું. ઓપનર કાયલે માયર્સે 20 અને ઈવિન લૂઈસે 14 રન નોંધાવ્યા હતા જ્યારે બ્રેન્ડન કિંગ 17 રન નોંધાવીને આઉટ થયો હચતો. જોકે, બાદમાં મિડલ ઓર્ડરમાં સુકાની નિકલસ પુરન અને શમારહ બ્રૂક્સ ચાર-ચાર રન નોંધાવીને આઉટ થયા હતા. જ્યારે રોમવેન પોવેલે પાંચ રન નોંધાવ્યા હતા. ટીમ માટે જેસન હોલ્ડરે સૌથી વધુ 38 રન નોંધાવ્યા હતા. તેણે 33 બોલમાં ચાર ચોગ્ગા અને એક સિક્સર ફટકારી હતી. સ્કોટલેન્ડ માટે માર્ક વોટે ત્રણ તથા બ્રાન્ડ વ્હીલ અને માઈકલ લીસ્કે બે-બે વિકેટ ઝડપી હતી. જોશ ડેવી અને સફયાન શરિફને એક-એક સફળતા મળી હતી.
રિચી બેરિંગ્ટનની આગેવાનીવાળી ટીમે હવે સુપર-12 સ્ટેજમાં પહોંચવા માટે આયર્લેન્ડને પરાજય આપવો પડશે. તેણે કહ્યું હતું કે અમે વન-ડે ક્રિકેટ વધારે રમ્યા છીએ જ્યારે ટી20 ક્રિકેટ રમવાની વધારે તક મળી નથી. અમે અમારી વન-ડે સ્કિલને ટી20 ફોર્મેટમાં ટ્રાન્સફર કરી છે. જ્યારે વેસ્ટ ઈન્ડિઝના સુકાની નિકોલસ પુરને જણાવ્યું હતું કે, અમારે વધારે મહેનત કરવી પડશે અને બાકીની બંને મેચ જીતવી પડશે. અમે પરાજયની જવાબદારી લઈએ છીએ અને આગામી મેચમાં વધારે શ્રેષ્ઠ પ્રદર્શન કરીશું.