સુપર સિક્સ મેચમાં શ્રીલંકા સામે ઝિમ્બાબ્વેની ટીમ 32.5 ઓવરમાં માત્ર 165 રનમાં ઓલઆઉટ થઈ ગઈ હતી. 166 રનના લક્ષ્યાંકને પાર પાડવામાં શ્રીલંકન ટીમને વધારે મુશ્કેલી પડી ન હતી. શ્રીલંકાએ 33.1 ઓવરમાં માત્ર એક વિકેટ ગુમાવીને 169 રન બનાવ્યા હતા અને 9 વિકેટે મેચ જીતી લીધી હતી. શ્રીલંકા બેટિંગ અને બોલિંગ બંનેમાં શાનદાર પ્રદર્શન કર્યું હતું.
તિક્ષણા અને મધુશંકા વિજયના હીરો હતા
ઝિમ્બાબ્વે સામેની આ જીતમાં શ્રીલંકા માટે મહેશ તિક્ષણા અને દિલશાન મધુશંકા હીરો રહ્યા હતા. આ બંને ખેલાડીઓએ શ્રીલંકા તરફથી બોલિંગમાં કુલ 7 વિકેટ ઝડપી હતી. મહેશ તિક્ષાનાએ 8.2 ઓવરમાં 25 રન આપીને 4 વિકેટ લીધી હતી જ્યારે મધુશંકાએ ત્રણ વિકેટ પોતાના નામે કરી હતી. જ્યારે મતિષા પથિરાનાએ બે જ્યારે કેપ્ટન શનાકાએ એક વિકેટ ઝડપી હતી.
શ્રીલંકાની આ શાનદાર બોલિંગ સામે ઝિમ્બાબ્વેની બેટિંગ લાઈન અપને બિલકુલ રિકવર થવાની તક મળી ન હતી. ઝિમ્બાબ્વેએ તેની પ્રથમ વિકેટ માત્ર બે રનમાં ગુમાવી દીધી હતી. આ પછી ટીમે નિયમિત અંતરાલ પર પોતાની વિકેટ ગુમાવી હતી. ઝિમ્બાબ્વેની અડધી ટીમ 127 રનના સ્કોર પર પેવેલિયન પરત ફરી હતી. ઝિમ્બાબ્વે તરફથી સીન વિલિયમ્સે સૌથી વધુ 56 રનની ઈનિંગ્સ રમી હતી. વિલિયમ્સની 50 કે તેથી વધુ રનની આ સતત ત્રીજી ઈનિંગ્સ હતી. સીન વિલિયમ્સ ઉપરાંત સિકંદર રઝાએ 31 રનનું યોગદાન આપ્યું હતું. આ સિવાય અન્ય કોઈ બેટ્સમેન તેની લયમાં જોવા મળ્યો ન હતો જેના કારણે ટીમ 165 રનના સ્કોર પર સમેટાઈ ગઈ હતી.
શ્રીલંકા તરફથી નિશંકાએ સદી ફટકારી હતી
ઝિમ્બાબ્વે સામેની આ મેચમાં પથુમ નિશંકાએ 101 રનની અણનમ ઈનિંગ્સ રમી હતી. પોતાની ઈનિંગ્સમાં તેણે 102 બોલનો સામનો કર્યો અને 14 ચોગ્ગા ફટકાર્યા હતા. દિમુથ કરુણારત્નેએ 56 બોલમાં 30 રન ફટકાર્યા હતા, જ્યારે કુશલ મેન્ડિસ 25 રન નોંધાવીને અણનમ રહ્યો હતો. નિશંકાની શાનદાર સદીએ શ્રીલંકાની વિજયનો માર્ગ વધારે આસાન બનાવી દીધો હતો.