srh vs kkr, IPL: હેરી બ્રૂકની ઝંઝાવાતી સદી, સનરાઈઝર્સ હૈદરાબાદે કોલકાતા નાઈટ રાઈડર્સને કચડ્યું – ipl 2023 harry brook ton breaks kolkata knight riders winning run

જોકે, રાણાએ આક્રમક બેટિંગ જાળવી રાખી હતી. તેને સામે છેડે રિંકુ સિંહનો સાથ મળ્યો હતો. આન્દ્રે રસેલ ત્રણ રન જ નોંધાવી શક્યો હતો. નિતિશ રાણાએ પોતાની અડધી સદી પૂરી કરી હતી. તેની બેટિંગથી ટીમની થોડી આશાઓ જીવંત રહી હતી. જોકે, તે આઉટ થઈ ગયો હતો અને તેની લડાયક બેટિંગ પણ એળે ગઈ હતી. તેણે 41 બોલમાં પાંચ ચોગ્ગા અને છ સિક્સરની મદદથી 75 રનની તાબડતોબ ઈનિંગ્સ રમી હતી. જ્યારે રિંકુ સિંહે પણ આક્રમક બેટિંગ કરીને લડત આપી હતી. તેણે 31 બોલમાં ચાર ચોગ્ગા અને ચાર સિક્સરની મદદથી અણનમ 58 રન ફટકાર્યા હતા. હૈદરાબાદ માટે માર્કો જેનસેન અને મયંક માર્કન્ડેએ બે-બે તથા ભુવનેશ્વર કુમાર, ટી નટરાજન અને ઉમરાન મલિકે એક-એક વિકેટ ઝડપી હતી.

હેરી બ્રૂકની તોફાની સદી, માર્કરામે પણ ફટકારી આક્રમક અડધી સદી
કોલકાતા નાઈટ રાઈડર્સે ટોસ જીતીને સનરાઈઝર્સ હૈદરાબાદને પ્રથમ બેટિંગનું આમંત્રણ આપ્યું હતું. હૈદરાબાદની શરૂઆત સારી રહી હતી પરંતુ બાદમાં ટીમને ઉપરા-ઉપરી બે ઝટકા લાગ્યા હતા. હેરી બ્રૂક અને મયંક અગ્રવાલની ઓપનિંગ જોડીએ સારી શરૂઆત અપાવી હતી પરંતુ તેમાં સૌથી મોટું યોગદાન બ્રૂકનું હતું. આ જોડીએ 4.1 ઓવરમાં 46 રનની ભાગીદારી નોંધાવી હતી. જેમાં મયંકનું યોગદાન ફક્ત નવ રનનું રહ્યું હતું. મયંક અગ્રવાલ આઉટ થયા બાદ રાહુલ ત્રિપાઠી પણ નવ રને પેવેલિયન ભેગો થઈ ગયો હતો. આમ ટીમે 57 રનમાં પોતાની બે વિકેટ ગુમાવી દીધી હતી.

જોકે, હૈદરાબાદની બેટિંગનું મુખ્ય આકર્ષણ હેરી બ્રૂકની તોફાની બેટિંગ રહી હતી. બ્રૂક અને માર્કરામની જોડીએ 72 રનની ભાગીદારી નોંધાવી હતી. માર્કરામ 26 બોલમાં બે ચોગ્ગા અને પાંચ સિક્સરની મદદથી 50 રન નોંધાવીને આઉટ થયો હતો. જ્યારે બ્રૂકે 55 બોલમાં 12 ચોગ્ગા અને ત્રણ સિક્સરની મદદથી અણનમ 100 રન ફટકાર્યા હતા. આ ઉપરાંત અભિષેક શર્માએ 17 બોલમાં 32 રન ફટકાર્યા હતા જેમાં ત્રણ ચોગ્ગા અને બે સિક્સર સામેલ હતી. ક્લાસેન 16 રને નોટઆઉટ રહ્યો હતો. કોલકાતા માટે આન્દ્રે રસેલે ત્રણ તથા વરૂણ ચક્રવર્તીએ એક વિકેટ ઝડપી હતી.