shubman gill, ત્રીજી ટી20: શુભમનની તોફાની સદી-હાર્દિકનો ઝંઝાવાત, ન્યૂઝીલેન્ડ સામે ભારતે સિરીઝ જીતી – india vs new zealand 3rd t20 at narendra modi stadium ahmedabad 1st february 2023

શુભમન ગિલની ધમાકેદાર સદી બાદ કેપ્ટન હાર્દિક પંડ્યા સહિતના બોલર્સની ઘાતક બોલિંગની મદદથી ભારતે અમદાવાદના નરેન્દ્ર મોદી સ્ટેડિયમમાં રમાયેલી ત્રીજી અને નિર્ણાયક મેચમાં 168 રનના વિશાળ અંતરથી વિજય નોંધાવ્યો હતો. આ સાથે જ હાર્દિક પંડ્યાની આગેવાનીવાળી ભારતીય ટીમે ત્રણ મેચની સિરીઝ 2-1થી જીતી લીધી હતી. ‘ટી20 ક્રિકેટમાં રનની દ્રષ્ટીએ આ ભારતનો અત્યાર સુધીનો સૌથી મોટો વિજય છે. ત્રીજી ટી20માં બેટિંગ અને બોલિંગ બંનેમાં ટીમ ઈન્ડિયાનું પ્રદર્શન લાજવાબ રહ્યું હતું. ટોસ જીતીને પ્રથમ બેટિંગ કરતાં ભારતીય ટીમે નિર્ધારીત 20 ઓવરમાં ચાર વિકેટે 234 રનનો વિશાળ સ્કોર ખડક્યો હતો. જેમાં શુભમન ગિલે અણનમ 126 રન ફટકાર્યા હતા અને આ તેની પ્રથમ ટી20 સદી પણ હતી. 235 રનના જંગી લક્ષ્યાંક સામે ન્યૂઝીલેન્ડની ટીમ પત્તાના મહેલની માફક વેરવિખેર થઈ ગઈ હતી. પ્રવાસી ટીમ 12.1 ઓવરમાં 66 રનમાં ઓલ-આઉટ થઈ ગઈ હતી. હાર્દિક પંડ્યાએ સૌથી વધુ ચાર વિકેટ ઝડપી હતી. હાર્દિક પંડ્યાને પ્લેયર ઓફ ધ સિરીઝ અને શુભમન ગિલને પ્લેયર ઓફ ધ મેચ જાહેર કરવામાં આવ્યા હતા. અગાઉ ભારતે ત્રણ મેચની વન-ડે સિરીઝમાં ન્યૂઝીલેન્ડનો 3-0થી વ્હાઈટવોશ કર્યો હતો.

ન્યૂઝીલેન્ડનો શરમજનક દેખાવ, ભારતનો સૌથી મોટો વિજય
235 રનના લક્ષ્યાંકના જવાબમાં ન્યૂઝીલેન્ડની ટીમ 12.1 ઓવરમાં 66 રનમાં જ આઉટ થઈ ગઈ હતી. આંતરરાષ્ટ્રીય ટી20 ક્રિકેટમાં ન્યૂઝીલેન્ડનો આ ત્રીજો સૌથી ઓછો સ્કોર છે. અગાઉ તે બે વખત 60-60 રનના સ્કોર પર આઉટ થઈ ચૂકી છે. ભારતે ન્યૂઝીલેન્ડ સામે 168 રને વિજય નોંધાવ્યો હતો. રનની દ્રષ્ટીએ ભારતનો આ અત્યાર સુધીનો સૌથી મોટો ટી20 વિજય છે. અગાઉ ભારતે 2018માં આયર્લેન્ડ સામે 143 રને વિજય નોંધાવ્યો હતો. ત્રીજી ટી20માં ન્યૂઝીલેન્ડ સામે ડેરીલ મિચેલે સૌથી વધુ 35 રન નોંધાવ્યા હતા. જ્યારે કેપ્ટન મિચેલ સેન્ટનરે 13 રનનું યોગદાન આપ્યું હતું. આ સિવાય કોઈ બેટર મોટો સ્કોર નોંધાવી શક્યો ન હતો. ભારત માટે હાર્દિક પંડ્યાએ ચાર વિકેટ ઝડપી હતી. જ્યારે અર્શદીપ સિંહ, ઉમરાન મલિક અને શિવમ માવિએ બે-બે વિકેટ ઝડપી હતી.

શુભમન ગિલની ધમાકેદાર સદી, ટીમ ઈન્ડિયાનો જંગી સ્કોર
કેપ્ટન હાર્દિક પંડ્યાએ ટોસ જીતીને પ્રથમ બેટિંગનો નિર્ણય કર્યો હતો. આ મેચમાં ઓપનર પૃથ્વી શોને તક આપવામાં આવી શકે છે તેમ માનવામાં આવી રહ્યું હતું. જોકે, પૃથ્વીને તક મળી ન હતી. ઈશાન કિશન અને શુભમન ગિલની જોડી ઓપનિંગમાં આવી હતી. ઈશાન કિશન સસ્તામાં આઉટ થઈ ગયો હતો. કિશન ફક્ત એક જ રન નોંધાવી શક્યો હતો. ત્યારબાદ શુભમન અને રાહુલ ત્રિપાઠીની જોડીએ આક્રમક બેટિંગ કરી હતી. તેમાં પણ રાહુલ ત્રિપાઠી ઘણો આક્રમક રહ્યો હતો. તેણે 22 બોલમાં 44 રન ફટકાર્યા હતા જેમાં ચાર ચોગ્ગા અને ત્રણ સિક્સર સામેલ હતી.

શુભમન ગિલ અને રાહુલ ત્રિપાઠીએ 86 રનની ભાગીદારી નોંધાવી હતી. ત્યારપછી બેટિંગમાં આવેલો સૂર્યકુમાર યાદવ 13 બોલમાં એક ચોગ્ગા અને બે સિક્સરની મદદથી 24 રન નોંધાવીને આઉટ થયો હતો પરંતુ શુભમન ગિલે પોતાની દમદાર બેટિંગ ચાલું રાખી હતી અને બાદમાં તેણે વધારે ઝડપ પકડી હતી. શુભમન ગિલે પોતાની પ્રથમ આંતરરાષ્ટ્રીય ટી20 અડધી સદીને સદીમાં ફેરવવામાં સફળતા મેળવી હતી. શુભમન ગિલે આંતરરાષ્ટ્રીય ટી20માં પોતાની પ્રથમ સદી ફટકારી હતી. શુભમન ગિલે 63 બોલમાં અણનમ 126 રન ફટકાર્યા હતા જેમાં 12 ચોગ્ગા અને સાત સિક્સર ફટકારી હતી. આ ઉપરાંત કેપ્ટન હાર્દિક પંડ્યાએ 30 રનનું યોગદાન આપ્યું હતું. ન્યૂઝીલેન્ડ માટે માઈકલ બ્રાસવેલ, બ્લેર ટિકનર, ઈશ સોઢી અને ડેરીલ મિચેલે એક-એક વિકેટ ઝડપી હતી.