શુભમન ગિલે ફટકારી સદી, કોહલી પણ જોવા મળ્યો રંગમાં
પ્રથમ ત્રણ ટેસ્ટમાં બંને ટીમના બેટર્સનું પ્રદર્શન નિરાશાજનક રહ્યું હતું. જોકે, ચોથી ટેસ્ટમાં બંને ટીમના બેટર્સે કમાલ કરી છે. રોહિત શર્મા અને શુભમન ગિલની ઓપનિંગ જોડીએ ભારતને સારી શરૂઆત અપાવી હતી. આ જોડીએ 74 રનની ભાગીદારી નોંધાવી હતી. રોહિત શર્મા 35 રન નોંધાવીને આઉટ થયો હતો. ત્યારબાદ શુભમન ગિલે ચેતેશ્વર પૂજારા સાથે મળીને ઈનિંગ્સ આગળ ધપાવી હતી. આ જોડીએ સદીની ભાગીદારી નોંધાવી હતી. પૂજારા અને ગિલે 113 રનની ભાગીદારી નોંધાવી હતી. પૂજારા 121 બોલમાં ત્રણ ચોગ્ગાની મદદથી 42 રન ફટકારીને આઉટ થયો હતો.
પૂજારા આઉટ થયા બાદ ગિલે વિરાટ કોહલી સાથે જોડી જમાવી હતી. આ દરમિયાન શુભમન ગિલે પોતાની બીજી ટેસ્ટ સદી પૂરી કરી હતી. ગિલ અને કોહલીએ 48 રનની ભાગીદારી નોંધાવી હતી. અંતે નાથન લાયન શુભમન ગિલને આઉટ કરવામાં સફળ રહ્યો હતો. તેણે 235 બોલનો સામનો કરતાં 12 ચોગ્ગા અને એક સિક્સરની મદદથી 128 રનની ઈનિંગ્સ રમી હતી. જ્યારે કોહલી 128 બોલમાં પાંચ ચોગ્ગાની મદદથી 59 રન નોંધાવીને રમતમાં છે. રવિન્દ્ર જાડેજા પણ 16 રને રમતમાં છે. ઓસ્ટ્રેલિયા માટે નાથન લાયન, ટોડ મર્ફી અને મેથ્યુ કુહનેમને એક-એક વિકેટ ઝડપી હતી.