હકીકતમાં, એશિયા કપમાં સુપર-4 રાઉન્ડના મુકાબલામાં ઘણા મહત્વના સમયે અર્શદીપ સિંહે પાકિસ્તાનના બેટ્સમેન આસિફ અલીનો ઘણો જ સરળ કેચ છોડી દીધો હતો. પરિણામ એ આવ્યું હતું કે, ભારતીય ટીમે એ મેચમાં હારનો સામનો કરવો પડ્યો હતો. ભારતની હાર પછી સોશિયલ મીડિયા પર અર્શદીપ સિંહને ઘણો ટ્રોલ કરાયો. લોકોએ તેને ખાલીસ્તાની અને દેશદ્રોહી પણ કરી દીધો. તે પછીથી દેશમાં આ મુદ્દો હોટ ટોપિક બનેલો છે.
અન્ય ખેલાડીઓ પણ કરી ચૂક્યા છે અર્શદીપનો સપોર્ટ
સચિન તેંડુલકર પહેલા ઘણા બીજા ક્રિકેટર્સએ પણ અર્શદીપનો સપોર્ટ કર્યો હતો. વિરાટ કોહલીએ તો મેચ પછી જ પ્રેસ કોન્ફ્રન્સમાં કેચ છૂટવાની ઘટનાને સામાન્ય જણાવી હતી. પૂર્વ ક્રિકેટર અને કોમેન્ટેટર આકાશ ચોપડા સહિત ઘણા અન્ય લોકોએ ટ્વિટર ડીપીમાં અર્શદીપનો ફોટો લગાવી ટ્રોલરને જવાબ આપ્યો હતો.
ભારતે પાકિસ્તાનને 5 વિકેટે હરાવ્યું હતું
દુબઈ ઈન્ટરનેશનલ સ્ટેડિયમમાં ભારત અને પાકિસ્તાન વચ્ચે રમાયેલી એ મેચમાં પાકિસ્તાને ટોસ જીતી ભારતને પહેલા બેટિંગમાં ઉતાર્યું હતું. ભારતે કોહલીના શાનદાર 60 રનની મદદથી 20 ઓવરમાં 180 રન બનાવ્યા હતા. તેની સામે પાકિસ્તાને મોહમ્મદ રિઝવાન (71 રન) અને મોહમ્મદ નવાઝ (42 રન)ની મદદથી 5 વિકેટે જીતી લીધી હતી. મેચમાં પલ્લું જ્યારે બંને તરફી બરાબર હતું એ જ સમયે અર્શદીપ સિંહે આસિફ અલીનો કેચ છોડ્યો હતો. આસિફે અણીના સમયે 8 દડામાં 16 રન બનાવી પાકિસ્તાનની જીતમાં મહત્વનો ફાળો આપ્યો હતો. આ કેચ છોડવાના કારણે ભારતની હાર થઈ હોવાનો રોષ રાખી ભારતીય ટીમના ફેન્સ અર્શદીપ સિંહને વિલન ચીતરવા લાગ્યા અને સોશિયલ મીડિયા પર તેને ટ્રોલ કરવા લાગ્યા.