મહારાષ્ટ્રના ઓપનર ઋતુરાજ ગાયકવાડે વિજય હજારે ટ્રોફીમાં એક મોટી સિદ્ધિ મેળવી હતી. આ પ્રતિષ્ઠિત ટૂર્નામેન્ટની ક્વાર્ટર ફાઈનલ મેચમાં ગાયકવાડે એક ઓવરમાં 7 સિક્સર ફટકારી હતી. આવું કરનાર તે વિશ્વનો પ્રથમ બેટ્સમેન બની ગયો છે. તેણે મેચની 49મી ઓવરમાં આ કર્યું હતું. સાત શાનદાર સિક્સરની મદદથી ગાયકવાડે આ મેચમાં બેવડી સદી ફટકારી હતી.
અહીં નોંધનીય છે કે થોડા સમય પહેલા ભારતના યુવા બેટ્સમેન ઋતુરાજ ગાયકવાડનું નામ મરાઠી અભિનેત્રી સયાલી સંજીવની સાથે જોડાયું હતું. વિજય હજારે ટ્રોફી 2022માં 2 વખત સદી ફટકારનાર ઋતુરાજનું નામ એક્ટ્રેસ સયાલી સાથે જોડવામાં આવી રહ્યું હતું પરંતુ એક્ટ્રેસે ઋતુરાજ સાથેનાં પોતાના અફેરને લઇને મૌન તોડ્યું હતું. સયાલી સંજીવે એક ઇન્ટરવ્યુમાં જણાવ્યું હતું કે, એવું કંઇ પણ નથી. આ અફવાઓનાં કારણે અમારી મિત્રતા પણ ખરાબ થઇ ગઇ છે. અમે હવે એતબીજા સાથે મિત્ર બનીને પણ વાત નથી કરી શકતા. કશું હતું નહીં. મને તો ખબર પણ નથી કે શા માટે અમને સાથે જોડવામાં આવે છે.
તમામ અફવાઓ ત્યારે શરૂ થઇ જ્યારે ઋતુરાજે સયાલી સંજીવની પોસ્ટ પર ટિપ્પણી કરી હતી. જો કે તે સમયે પોતાના સંબંધોને લઇને બંનેમાંથી કોઇએ પણ સ્પષ્ટતા આપી નહોતી. સયાલીએ કહ્યું હતું કે અફવાઓને લીધે અમારા અંગત જીવનમાં પણ સમસ્યાઓ પેદા થઇ છે અને તે ગોસિપ કરનારને પણ સમજાશે નહીં. તે એક સારો ખેલાડી છે અને શરૂઆતમાં અમે આ વિષય પર વાત કરી હતી. પહેલા તો અમે એ કહીને આ વાત ટાળી કે અફવાઓ હશે. અમે હંમેશાં વિચારતા કે સત્ય સામે આવી જશે ત્યારે બધાને ખબર પડી જશે.