રિશભ પંતે સોશિયલ મીડિયા પર પોતાની તસ્વીરો પોસ્ટ કરતા લખ્યું છે કે, એક ડગલું આગળ, એક ડગલું મજબૂત, એક ડગલું શાનદાર. પંતે આ તસ્વીરો પોસ્ટ કર્યા બાદ તેના ચાહકો અને ફેન્સ ભાવુક બની ગયા હતા. તેના ફેન્સે તેના ઝડપથી સાજા થવાની કામના કરી હતી.
નોંધનીય છે કે પંત ગત વર્ષના અંતમાં 30 ડિસેમ્બરે સવારે પોતાની કાર લઈને પરિવારજનોને સરપ્રાઈઝ આપવા માટે દિલ્થી રૂડકી જઈ રહ્યો હતો. ત્યારે રસ્તામાં તેની કારનો અકસ્માત થયો હતો. કાર ડિવાઈડર સાથે અથડાઈને પલટી ગઈ હતી અને બાદમાં તેમાં આગ લાગી ગઈ હતી. જોકે, આ અકસ્માતમાં તેનો જીવ બચી ગયો હતો પરંતુ તેને ગંભીર ઈજાઓ થઈ હતી.
પહેલા તેને દેહરાદૂનની હોસ્પિટલમાં દાખલ કરવામાં આવ્યો હતો. બાદમાં ભારતીય ક્રિકેટ કંટ્રોલ બોર્ડ તેને એરલિફ્ટ કરીને મુંબઈ લાવ્યું હતું. જ્યાં કોકિલાબેન અંબાણી હોસ્પિટલમાં તેની સર્જરી કરવામાં આવી હતી. જોકે, રિશભ પંતને સંપૂર્ણ પણે ફિટ થવામાં હજી ઘણો સમય લાગશે. તેથી તે ક્રિકેટના મેદાનમાં ક્યારે પરત ફરશે તે નક્કી નથી. જેના કારણે તે આઈપીએલ અને આ વર્ષના અંતમાં ભારતમાં રમાનારો વન-ડે વર્લ્ડ કપ પણ ગુમાવે તેવી શક્યતા છે.