વર્તમાન ટુર્નામેન્ટમાં બને ટીમોએ સેમિફાઈનલમાં ધમાકેદાર પ્રદર્શન કર્યું છે. પાકિસ્તાને ન્યૂઝીલેન્ડ સામે સાત વિકેટે વિજય નોંધાવ્યો હતો. જ્યારે ઈંગ્લેન્ડે સુકાની જોસ બટલર અને એલેક્સ હેલ્સની તોફાની બેટિંગની મદદથી ભારત સામે 10 વિકેટે શાનદાર વિજય નોંધાવ્યો હતો. 2009ની ચેમ્પિયન પાકિસ્તાની ટીમને ભારત અને ઝિમ્બાબ્વે સામે પરાજયનો સામનો કરવો પડ્યો હતો પરંતુ બાદમાં તેણે સારું પ્રદર્શન કરીને ફાઈનલ સુધીની સફર ખેડી છે. આ ઉપરાંત નસીબે પણ પાકિસ્તાનને સાથ આપ્યો હતો.
નેધરલેન્ડ્સના કારણે પાકિસ્તાની ટીમને ફાઈનલની તક મળી
પાકિસ્તાની ટીમ ટુર્નામેન્ટની બહાર થવાને આરે આવી ગઈ હતી પરંતુ ગ્રુપ સ્ટેજના અંતિમ દિવસે નેધરલેન્ડ્સે પાકિસ્તાનની લાજ રાખી હતી અને તેને સેમિફાઈનલમાં પહોંચાડવાની તક આપી હતી. પાકિસ્તાન અને સાઉથ આફ્રિકાના ચાર-ચાર પોઈન્ટ હતા. જોકે, નેધરલેન્ડ્સે સાઉથ આફ્રિકાને પરાજય આપ્યો હતો જેના કારણે પાકિસ્તાનને તક મળી હતી. પાકિસ્તાને પોતાની અંતિમ ગ્રુપ મેચમાં બાંગ્લાદેશને હરાવીને સેમિફાઈનલમાં પ્રવેશ કર્યો હતો. પાકિસ્તાનની ટીમ પાસે મજબૂત બોલિંગ આક્રમણ છે પરંતુ ટુર્નામેન્ટમાં તે અપેક્ષા પ્રમાણે પ્રદર્શન કરી શક્યું નથી. ઝડપી બોલર શાહિન શાહ આફ્રિદી ઉપરાંત હેરિસ રઉફ પણ મજબૂત બોલર છે. આ ઉપરાંત સુકાની બાબર આઝમ અને મોહમ્મદ રિઝવાનની જોડીએ ફોર્મ પરત મેળવી લીધું છે.
જોસ બટલર રચી શકે છે ઈતિહાસ
ઈંગ્લેન્ડની ટીમ 2010માં વેસ્ટ ઈન્ડિઝમાં રમાયેલા ટી20 વર્લ્ડ કપમાં ચેમ્પિયન બની હતી. જ્યારે વર્તમાન વન-ડે વર્લ્ડ ચેમ્પિયન ઈંગ્લેન્ડ ફરીથી ટી20 વર્લ્ડ કપ જીતવા માટે મક્કમ છે. જો બટલરની ટીમ ટી20 વર્લ્ડ કપ જીતી જશે તો તે એક જ સમયે બે વર્લ્ડ કપ જીતનારી પ્રથમ ટીમ બની જશે. ઈયોન મોર્ગને નિવૃત્તિ લીધા બાદ જોસ બટલરને કેપ્ટન બનાવવામાં આવ્યો હતો. બટલર અને એલેક્સ હેલ્સ ફોર્મમાં આવી ગયા છે. આ ઉપરાંત ટીમ પાસે બેન સ્ટોક્સ, ફિલ સોલ્ટ, મોઈન અલી, હેરી બ્રુક અને લિયામ લિવિલંસ્ટોન જેવા બેટર પણ છે. બોલિંગમાં પણ ટીમ પાસે સારા બોલર છે. બેન સ્ટોક્સ, સેમ કરન અને ક્રિસ વોક્સ સારું પ્રદર્શન કરી શકવા સક્ષમ છે.