પાકિસ્તાન ક્રિકેટ બોર્ડે ટી20 વર્લ્ડ કપમાં ભારત સામે પરાજય બાદ ડ્રેસિંગ રૂમમાં સુકાની બાબર આઝમના ભાષણનો વિડીયો સોશિયલ મીડિયા પર મૂક્યો હતો. ત્યારબાદ રવિવારે જ્યારે ટીમે સેમિફાઈનલ માટે ક્વોલિફાઈ કર્યું ત્યારે બાબર આઝમ અને ટીમના મેન્ટર મેથ્યુ હેડનનો વિડીયો પણ સોશિયલ મીડિયા પર અપલોડ કર્યો હતો.
વસીમ અકરમ અને વકાર યુનિસે કહ્યું હતું કે ડ્રેસિંગ રૂમમાં જે કંઈ થાય છે તેને ગુપ્ત રાખવું જોઈએ. અકરમે એક ચેનલને કહ્યું હતું કે, જો હું બાબર આઝમની જગ્યાએ હોત તો વિડીયો બનાવનારા શખ્સને ત્યારે જ રોકી દીધો હોત કેમ કે ડ્રેસિંગ રૂમમાં ઘણી વ્યક્તિગત વાતો પણ થતી હોય છે અને જો તેને જાહેર કરી દેવામાં આવે છે તો તેનાથી શરમજનક પરિસ્થિતિ પણ ઊભી થાય છે.
તેણે કહ્યું હતું કે મને નથી લાગતું કે અન્ય કોઈ ટીમે વર્લ્ડ કપમાં કે તેના પહેલા આવું કર્યું હશે. હું પ્રશંસકોની સંખ્યા વધારવાની ઈચ્છા અને પ્રયાસને સમજી શકું છું પરંતુ આ વધારે પડતું છે. વકારે પણ અકરમની વાતો અંગે સહમતી વ્યક્ત કરી હતી અને કહ્યું હતું કે પહેલા પણ ડ્રેસિંગ રૂમની વાતો જાહેર થવાથી પાકિસ્તાની ક્રિકેટને નુકસાન થયું છે. તેણે કહ્યું હતું કે અકરમે જે કહ્યું તેનાથી હું સો ટકા સહમત છું. ડ્રેસિંગ રૂમમાં જે કંઈ પણ થાય છે તેને ત્યાં સુધી જ મર્યાદિત રાખવું જોઈએ. આ હાલની સમસ્યા નથી પરંતુ આ પહેલા પણ ડ્રેસિંગ રૂમની વાતો મીડિયામાં લીક થઈ ગઈ હતી.
નોંધનીય છે કે વર્તમાન ટી20 વર્લ્ડ કપમાં પ્રથમ મેચમાં પાકિસ્તાનનો ભારત સામે પરાજય થયો હતો અને ત્યારબાદ ઝિમ્બાબ્વે સામે પણ ટીમ હારી ગઈ હતી. પરંતુ ત્યારબાદ રવિવારે પોતાની અંતિમ ગ્રુપ મેચમાં સાઉથ આફ્રિકાનો પરાજય થયો હતો અને આ દરમિયાન ટુર્નામેન્ટમાં બાકીની મેચોમાં પાકિસ્તાનનું પ્રદર્શન સારું રહ્યું હતું. જેના કારણે બાબર આઝમની ટીમ સેમિફાઈનલમાં પહોંચી ગઈ છે. હવે 9 નવેમ્બર બુધવારે તેનો સામનો ન્યૂઝીલેન્ડ સામે થશે.