સિક્સર ફટકારીને બતાવ્યો એટિટ્યુડ
IPL 2010માં પંજાબ કિંગ્સ અને ચેન્નઈ સુપર કિંગ્સ વચ્ચે એક રોમાંચક મેચ રમાઈ હતી. ચેન્નઈ આ મેચ જીતીને પ્લેઓફ માટે ક્વોલિફાય થઈ ગયું હતું. પ્રથમ બેટિંગ કરતા પંજાબે 192 રનનો સ્કોર નોંધાવ્યો હતો. જવાબમાં ચેન્નઈએ સારી બેટિંગ કરી હતી. છેલ્લી ઓવરમાં ચેન્નઈને જીતવા માટે 16 રનની જરૂર હતી. આવી સ્થિતિમાં ધોનીએ 4 બોલમાં મેચ પૂરી કરી હતી. તેણે ચોથા બોલ પર લાંબી સિક્સર ફટકારીને ચેન્નઈ માટે મેચ જીતી લીધી હતી. ત્યારબાદ તે ઘણો ગુસ્સામાં જોવા મળ્યો હતો. બૂમો પાડતી વખતે તે ગુસ્સામાં હેલ્મેટ અને ગ્લોવ્ઝ પર મારતો જોવા મળ્યો હતો.
2019માં રાજસ્થાન રોયલ્સ વિરુદ્ધ
2019માં સવાઈ માનસિંહ સ્ટેડિયમમાં રાજસ્થાન રોયલ્સ અને ચેન્નઈ સુપર કિંગ્સ વચ્ચે મુકાબલો રમાયો હતો. જે ઘણો જ રોમાંચક રહ્યો હતો. આ મેચમાં રાજસ્થાન રોયલ્સે પ્રથમ બેટિંગ કરતા 151 રન નોંધાવ્યા હતા. ચેન્નઈની બેટિંગ પણ શાનદાર રહી હતી પરંતુ તેને જીતવા માટે ત્રણ બોલમાં આઠ રનની જરૂર હતી. મિશેલ સેન્ટનર સ્ટ્રાઈક પર હતો. રાજસ્થાન માટે છેલ્લી ઓવર ફેંકી રહેલા બેન સ્ટોક્સે સેન્ટનરને ફુલ ટોસ ફેંક્યો, જે ઊંચાઈને કારણે નો બોલ જેવો દેખાતો હતો. આ બોલ પર સેન્ટનરે બે રન લીધા હતા. બોલરના છેડે ઊભેલા અમ્પાયરે આ બોલને નો બોલ કહ્યો. પરંતુ લેગ અમ્પાયરે તેને લીગલ બોલ ગણાવ્યો હતો. આવી સ્થિતિમાં બાઉન્ડ્રી લાઈન પર ઊભેલો ધોની પોતાને રોકી શક્યો નહીં અને સીધો જ મેદાનમાં ઘુસી ગયો હતો. તેની અને બંને અમ્પાયરો વચ્ચે ઉગ્ર બોલાચાલી થઈ હતી. ધોની મેદાન પરના અમ્પાયરના આ નિર્ણયને થર્ડ અમ્પાયર પાસે લેવા માંગતો હતો. પરંતુ અમ્પાયરોએ ધોનીની વાત સાંભળી ન હતી. જોકે, ચેન્નઈએ મેચ જીતી લીધી હતી. પરંતુ ધોનીનું આ રૂપ જોઈને તમામ લોકોને ભારે આશ્ચર્ય પણ થયું હતું.
જ્યારે ધોની બ્રાવો પર ગુસ્સે થયો હતો
IPL 2021માં ચેન્નઈ સુપર કિંગ્સ અને મુંબઈ ઈન્ડિયન્સ વચ્ચેની મેચ દરમિયાન ધોની વેસ્ટ ઈન્ડિઝના ભૂતપૂર્વ સ્ટાર ઓલરાઉન્ડર અને પોતાના સાથી ખેલાડી ડ્વેન બ્રાવો પર ગુસ્સે થતો જોવા મળ્યો હતો. વાસ્તવમાં ચેન્નાઈની બોલિંગ દરમિયાન ધોની અને બ્રાવો વચ્ચે ખરાબ તાલમેલને કારણે એક કેચ ડ્રોપ થઈ ગયો હતો. ધોની મુંબઈના બેટ્સમેન સૌરભ તિવારીનો કેચ પકડવા દોડી રહ્યો હતો અને તેણે કોલ કર્યો કે તે આ કેચ લેશે. પરંતુ બ્રાવો પહેલેથી જ ત્યાં હતો. આવી સ્થિતિમાં બંનેમાં તાલમેલ ન રહ્યો અને કેચ ડ્રોપ થઈ ગયો હતો. આ ઘટના બાદ ધોની બ્રાવો પર ગુસ્સે થઈ ગયો હતો અને બ્રાવોને કંઈક કહેતો જોવા મળ્યો હતો.
દીપક ચહર પર ગુસ્સે થયો હતો ધોની
IPL 2019માં ચેન્નઈ સુપર કિંગ્સ અને પંજાબ કિંગ્સ વચ્ચે રમાયેલી મેચમાં ધોની ટીમના ફાસ્ટ બોલર દીપક ચહર પર ગુસ્સે થતો જોવા મળ્યો હતો. મેચમાં જ્યારે પંજાબને જીતવા માટે 2 ઓવરમાં 39 રનની જરૂર હતી. તો દીપક ચહર બોલિંગ કરવા આવ્યો હતો. ઓવરના પહેલા જ બોલ પર ચહરે નો બોલ કર્યો હતો અને આ બોલ પર બાઉન્ડ્રી આવી હતી. એટલું જ નહીં આગલા બોલમાં દીપકે નો બોલ પણ નાખ્યો, જેના પર 2 રન આવ્યા હતા. દીપકની વારંવારની ભૂલો ધોનીને બિલકુલ પસંદ આવી ન હતી. આવી સ્થિતિમાં ધોની ચાહર પાસે ગયો અને આકરા શબ્દોમાં તેને ઝાટકી નાંખ્યો હતો. દીપક કેપ્ટનને વારંવાર નો બોલ નાખવાનું કારણ જણાવી રહ્યો હતો, પરંતુ અંતે તેણે પોતાની ભૂલ સ્વીકારી લીધી હતી. જોકે, ધોનીની ઝાટકણી પછી દીપક ચહરે ડેવિડ મિલરની વિકેટ લઈને શાનદાર વાપસી કરી હતી. તેમજ ચેન્નઈ આ મેચ 22 રને જીતવામાં સફળ રહી હતી.
ધોનીએ પથિરાના પર પ્રહારો કર્યા હતા
IPL 2023માં રાજસ્થાન અને ચેન્નઈ વચ્ચે રમાયેલી મેચમાં પણ ધોની મેદાનમાં જ પોતાના પરનું નિયંત્રણ ગુમાવી બેઠો હતો. તેનો ગુસ્સો શ્રીલંકાના યુવાન ફાસ્ટ બોલર મથિશા પથિરાના પર હતો. ધોની પાસે રાજસ્થાનના બેટ્સમેનને રન આઉટ કરવાની શાનદાર તક હતી. આવી સ્થિતિમાં ધોનીએ પણ શાર્પ થ્રો કર્યો હતો. પરંતુ બોલિંગ કરી રહેલ મથિશા પથિરાના કેપ્ટન કૂલના થ્રોની વચ્ચે આવી ગયો અને બેટ્સમેન આઉટ થતા રહી ગયો હતો. સ્વાભાવિક રીતે જ ધોનીને પથિરાના થ્રોની વચ્ચે આવવું પસંદ આવ્યું નહોતું. ત્યારબાદ તે યુવાન ખેલાડી પર ગુસ્સે થતો જોવા મળ્યો હતો.