194 રનના વિશાળ લક્ષ્યાંકનો પીછો કરતા દિલ્હીએ પૃથ્વી શો અને સુકાની ડેવિડ વોર્નરની આક્રમક બેટિંગની મદદથી ઝડપી શરૂઆત કરી હતી. ટીમે 4.2 ઓવરમાં 41 રન નોંધાવ્યા હતા, પરંતુ તેની બીજી ઓવરના ત્રીજા અને ચોથા બોલ પર પૃથ્વી શો (12 રન) અને મિશેલ માર્શ (0) ઈંગ્લિશ ઝડપી બોલર માર્ક વૂડ દ્વારા ક્લીન બોલ્ડ થયા હતા જેના કારણે દિલ્હીની ટીમ બેકફૂટ પર આવી ગઈ હતી. દિલ્હીને તેના નિયમિત કેપ્ટન રિષભ પંતની ખોટ પડી. સરફરાઝ ખાન સસ્તામાં પેવેલિયન ભેગો થયો હતો. રેવમન પોવેલ પણ કંઈ ખાસ કરી શક્યો નહોતો. રિલે રૂસો સારા ફોર્મમાં દેખાઈ રહ્યો હતો, પરંતુ રવિ બિશ્નોઈએ તેને આઉટ કરીને દિલ્હીની આશા પર પાણી ફેરવી દીધું હતું. 16મી ઓવરમાં ડેવિડ વોર્નર આઉટ થયો ત્યાં સુધીમાં મેચ દિલ્હીની પકડમાંથી ઘણી બહાર નીકળી ગઈ હતી.
કેરેબિયન ખેલાડીએ દેખાડ્યો દમ
લખનૌના કેરેબિયન ઓપનર કાયલ માયર્સે 14 રન પર મળેલી લાઈફલાઈનનો સંપૂર્ણ લાભ લીધો અને 73 રન (બે ચોગ્ગા અને સાત છગ્ગા) સાથે અડધી સદી ફટકારી હતી. તેની તોફાની બેટિંગની મદદથી ધીમી શરૂઆત કરનારી લખનૌ સુપરજાયન્ટ્સની ટીમ 193 રનનો વિશાળ સ્કોર નોંધાવી શકી હતી. માયર્સે નવમી ઓવરમાં ચાઈનામેન બોલર કુલદીપ યાદવ (1/35) પર છગ્ગો ફટકારીને 28 બોલમાં પોતાની અડધી સદી પૂરી કરી હતી. દીપક હુડા (17 રન) અને માયર્સ વચ્ચે બીજી વિકેટ માટે 79 રનની ભાગીદારી થઈ હતી. માયર્સ ઉપરાંત વેસ્ટ ઈન્ડિયન નિકોલસ પૂરને 36 રનનું યોગદાન આપ્યું હતું જ્યારે અંતમાં આયુષ બદોનીએ સાત બોલમાં 18 રન ઉમેર્યા હતા.