ભારતીય ટીમને પણ મૂકી છે મુશ્કેલીમાં
ઝિમ્બાબ્વેએ ભારતીય ટીમને પણ મુશ્કેલીમાં મૂકી છે. આંતરરાષ્ટ્રીય ટી20 ક્રિકેટમાં બંને ટીમો સાત વખત આમને-સામને થઈ છે. જેમાંથી ભારતે પાંચ મેચ જીતી છે જ્યારે ઝિમ્બાબ્વેએ બે મેચમાં વિજય નોંધાવ્યો છે. છેલ્લે આ બંને ટીમો વચ્ચે 2016માં ટી20 મેચ રમાઈ હતી જેમાં ભારતીય ટીમ ફક્ત ત્રણ રનથી જીત્યું હતું. જેના કારણે ભારત ઝિમ્બાબ્વેને હળવાશથી લેવાની ભૂલ કરશે નહીં. 1999ના વન-ડે વર્લ્ડ કપમાં ઝિમ્બ્બાવે ભારતને મોટો ઘા આપી ચૂક્યું છે. ત્યારે ભારતીય ટીમને ત્રણ રને પરાજયનો સામનો કરવો પડ્યો હતો. જોકે, ટી20 વર્લ્ડ કપમાં આ બંને ટીમો પ્રથમ વખત આમને સામને થશે.
ઝિમ્બાબ્વેની બોલિંગ મજબૂત છે
ઝિમ્બાબ્વેની બોલિંગ ઘણી જ મજબૂત છે. તેના બોલર્સ પાસે વધારે ગતિ નથી પરંતુ તેમની લંબાઈ સારી છે. તેના કારણે તેમને પિચ પરથી ઉછાળ મળે છે. પાકિસ્તાન વિરુદ્ધ આનો જ ઉપયોગ કરીને ઝિમ્બાબ્વેએ વિજય મેળવ્યો હતો. ભારતીય ટીમના મોટા ભાગના ખેલાડી પાસે તેમના વિરુદ્ધ રમવાનો વધારે અનુભવ નથી. ઝિમ્બાબ્વેની ટીમ તેનો પણ ફાયદો ઉઠાવી શકે છે.
સિકંદર રઝા હશે એક્સ ફેક્ટર
સિકંદર રઝા હાલમાં શાનદાર ફોર્મમાં છે. તેણે 23 ટી20 ઈન્ટરનેશનલ મેચમાં 35ની સરેરાશ અને 151ની સ્ટ્રાઈક રેટથી 701થી વધુ રન નોંધાવ્યા છે. તેણે ચાર અડધી સદી ફટકારી છે. બોલિંગમાં પણ તેનું પ્રદર્શન દમદાર રહ્યું છે. તેણે 6.14ની ઈકોનોમી રેટથી રન આપીને 24 વિકેટ ખેરવી છે. તેણે ઓગસ્ટમાં ભારત વિરુદ્ધ વન-ડે સીરિઝમાં સદી ફટકારી હતી. તે ભારત વિરુદ્ધ એક્સ ફેક્ટર સાબિત થઈ શકે છે.