ભારત માટે કેપ્ટન રોહિત શર્માએ 44 બોલમાં 57 રન ફટકાર્યા હતા જ્યારે તેના સાથી યુવાન ઓપનર યશસ્વી જયસ્વાલે 30 બોલમાં 38 રન ફટકાર્યા હતા. આમ આ જોડીએ 11.5 ઓવરમાં 98 રનની ભાગીદારી નોંધાવી હતી. ત્યારબાદ ભારતીય ટીમે 12.2 ઓવર એટલે કે 74 બોલમાં 100 રન પૂરા કર્યા હતા. 2001માં રમાયેલી એશિયન ટેસ્ટ ચેમ્પિયનશિપ દરમિયાન શ્રીલંકાની ટીમે બાંગ્લાદેશ સામે 13.2 ઓવરમાં એટલે કે 80 બોલમાં 100 રન ફટકાર્યા હતા.
વેસ્ટ ઈન્ડિઝ સામે રમાઈ રહેલી બીજી ટેસ્ટમાં ભારતીય ટીમનું પલડું ભારે દેખાઈ રહ્યું છે. ભારતે બે વિકેટે 181 રન નોંધાવીને પોતાનો બીજો દાવ ડિક્લેર કર્યો હતો. ટીમ ઈન્ડિયાએ યજમાન વેસ્ટ ઈન્ડિઝ સામે જીતવા માટે 365 રનનો ટાર્ગેટ મૂક્યો છે. ભારતે જ્યારે દાવ ડિક્લેર કર્યો ત્યાર શુભમન ગિલ 29 અને ઈશાન કિશન 34 બોલમાં 52 રન ફટારીને રમી રહ્યા હતા. જેના જવાબમાં રવિવારે ચોથા દિવસના અંતે વેસ્ટ ઈન્ડિઝે તેના બીજા દાવમાં 76 રનમાં બે વિકેટ ગુમાવી દીધી હતી.
અંતિમ દિવસે ભારતને ટેસ્ટ જીતવા માટે આઠ વિકેટની જરૂર છે. જ્યારે વેસ્ટ ઈન્ડિઝને 289 રનની જરૂર છે. અગાઉ ભારતે તેના પ્રથમ દાવમાં 438 રનનો જંગી સ્કોર નોંધાવ્યો હતો. જેના જવાબમાં વેસ્ટ ઈન્ડિઝનો પ્રથમ દાવ 255 રનમાં સમેટાઈ ગયો હતો. વેસ્ટ ઈન્ડિઝ પ્રવાસમાં ભારતીય ટીમ બે ટેસ્ટ રમવાની છે. ભારતે પ્રથમ ટેસ્ટ જીતી લીધી હતી અને હાલમાં તે 1-0થી આગળ છે.