રોહિત શર્માએ જયસૂર્યાને પાછળ રાખ્યો, હવે ક્રિસ ગેઈલનો વારો
ભારતીય કેપ્ટન રોહિત શર્માએ પોતાની 101 રનની ઈનિંગ્સમાં છ સિક્સર ફટકારી હતી. આ સાથે જ તે વન-ડે ક્રિકેટમાં સૌથી વધુ સિક્સર ફટકારનારા બેટર્સની યાદીમાં ત્રીજા ક્રમે આવી ગયો છે. રોહિત શર્માએ 272 સિક્સર ફટકારી છે અને આ દરમિયાન તેણે શ્રીલંકન લિજેન્ડ સનથ જયસૂર્યાના 270 સિક્સરના રેકોર્ડને તોડી નાંખ્યો હતો. આ યાદીમાં રોહિતથી આગળ હવે વેસ્ટ ઈન્ડિઝનો વિસ્ફોટક બેટર ક્રિસ ગેઈલ અને પાકિસ્તાનનો આક્રમક બેટર શાહિદ આફ્રિદી છે. ગેઈલે 331 સિક્સર ફટકારી છે જ્યારે આફ્રિદીના નામે 351 સિક્સર છે. આ ઉપરાંત રોહિતે 896 ચોગ્ગા પણ ફટકાર્યા છે.
રોહિત શર્માએ રિકી પોન્ટિંગના રેકોર્ડની બરાબરી કરી
રોહિત શર્માએ 101 રનની ઈનિંગ્સ રમી હતી. આ તેની વન-ડે કારકિર્દીની 30મી સદી છે. આ સાથે જ તેણે વન-ડેમાં સૌથી વધુ સિક્સર ફટકારવાના મામલે ઓસ્ટ્રેલિયાના ભૂતપૂર્વ દિગ્ગજ રિકી પોન્ટિંગના રેકોર્ડની બરાબરી કરી છે. રિકી પોન્ટિંગે 30 સદી ફટકારી હતી. આ યાદીમાં હવે ટોપ-5 બેટર્સમાં ત્રણેય ભારતીય બેટર્સ જ છે. વન-ડેમાં સૌથી વધુ સદી ફટકારવાનો રેકોર્ડ સચિન તેંડુલકરના નામે છે. સચિને 49 સદી ફટકારી છે. જ્યારે બીજા ક્રમે રહેલા વિરાટ કોહલીએ 46 સદી ફટકારી છે. જ્યારે ત્રીજા ક્રમે રોહિત શર્મા આવી ગયો છે.
ત્રણ વન-ડે મેચની દ્વિપક્ષીય સિરીઝમાં સૌથી વધુ રનઃ શુભમને બાબરની બરાબરી કરી
શુભમન ગિલે પોતાની છેલ્લી ચાર વન-ડેમાં ત્રણ સદી ફટકારી છે. તેમાં પણ ન્યૂઝીલેન્ડ સામેની પ્રથમ વન-ડેમાં તેણે બેવડી સદી ફટકારી હતી અને તે વન-ડેમાં બેવડી સદી ફટકારનારો યંગેસ્ટ બેટર બન્યો હતો. ત્રીજી વન-ડેમાં તેણે 112 રનની ઈનિંગ્સ રમી. આ સાથે જ તે ત્રણ વન-ડે મેચની દ્વિપક્ષીય સિરીઝમાં સૌથી વધુ રન નોંધાવવાના મામલે પાકિસ્તાનના બાબર આઝમની બરાબરી કરી લીધી છે. શુભમને ન્યૂઝીલેન્ડ સામે ત્રણ મેચમાં 360 રન ફટકાર્યા છે. જ્યારે બાબર આઝમે 2016માં વેસ્ટ ઈન્ડિઝ સામે ત્રણ મેચમાં 360 રન ફટકાર્યા હતા.