અજિંક્ય રહાણેએ અડિંગો જમાવ્યો હતો
અજિંક્ય રહાણેએ ફરી એકવાર સાબિત કરી દીધું છે કે તે ભારતીય ક્રિકેટના મહત્વના ખેલાડીઓમાં સામેલ છે. જે પિચ પર એક પછી એક ભારતીય બેટર પેવેલિયન ભેગા થઈ રહ્યા હતા. ત્યારે ટીમ ઈન્ડિયા પર ફોલો ઓનનો ભય તોળાઈ રહ્યો હતો. જ્યાં ઓસ્ટ્રેલિયાની ઝંઝાવાતી બોલિંગનો સામનો કરવો મુશ્કેલ સાબિત થઈ રહ્યું હતું ત્યાં મુંબઈના આ મિડલ ઓર્ડર બેટ્સમેને હાર માની ન હતી. ભલે તે 89 રન નોંધાવીને સદી ચૂકી ગયો, પરંતુ ટીમને ફોલોઓનથી બચાવી લીધી હતી.
પેટ કમિન્સનો બોલ વાગ્યો
ઝડપી બોલર અને વિરોધી કેપ્ટન પેટ કમિન્સનો એક બોલ અજિંક્ય રહાણેને વાગ્યો, જેના પછી તે પીડાથી કણસી ઉઠ્યો હતો. પરંતુ તેણે હિંમત હારી ન હતી અને સિક્સર ફટકારીને પોતાની અડધી સદી પૂરી કરી હતી.
આંગળી પર થઈ હતી ઈજા
અજિંક્ય રહાણેને આંગળી પર બોલ વાગ્યો તે જોઈને ફિઝિયો ફટાફટ મેદાન પર પહોંચ્યો હતો કારણ કે મેદાન પર ઓસ્ટ્રેલિયાને પડકાર ફેંકી રહેલી ટીમ ઈન્ડિયાની એકમાત્ર આશા અજિંક્ય રહાણે જ હતી.
અજિંક્ય રહાણેએ આપી હતી લડત
કોઈપણ રીતે ઈંગ્લિશ કન્ડિશનમાં બેટિંગ કરવી ખૂબ જ પડકારજનક હોય છે. પિચ હંમેશા બોલરોને મદદ કરતી હતી. આવી સ્થિતિમાં બેટ્સમેન સંજોગો અનુસાર જ સફળ બને છે. અજિંક્ય રહાણેએ એક છેડો જાળવી રાખ્યો હતો અને ઓસ્ટ્રેલિયાને લડત આપી હતી.
અજિંક્ય રહાણેએ પાંચ હજાર રન પૂરા કર્યા
આ સાથે અજિંક્ય રહાણે વર્લ્ડ ટેસ્ટ ચેમ્પિયનશિપની ફાઈનલમાં અડધી સદી ફટકારનારો પ્રથમ ભારતીય બન્યો હતો. અજિંક્ય રહાણે પણ ઝડપથી સદી તરફ આગળ વધી રહ્યો હતો. પરંતુ લંચ બ્રેક બાદ તે આઉટ થઈ ગયો હતો. કેમેરોન ગ્રીને પેટ કમિન્સના બોલ પર જબરદસ્ત કેચ કર્યો હતો અને રહાણેની લડતનો અંત આવ્યો હતો. અજિંક્ય રહાણેએ 89 રનની ઈનિંગ્સ રમી હતી. આ દરમિયાન તેણે ટેસ્ટ ક્રિકેટમાં પાંચ હજાર રન પણ પૂરા કર્યા અને આવું કરનાર તે માત્ર 13મો ભારતીય બેટ્સમેન બન્યો હતો.