સ્કોટ બોલેન્ડ એક મોટો ખતરો બની શકે છે
34 વર્ષીય સ્કોટ બોલેન્ડ ઓસ્ટ્રેલિયા માટે માત્ર 7 ટેસ્ટ રમ્યો છે, પરંતુ તેનો રેકોર્ડ શાનદાર છે. તેણે ઓસ્ટ્રેલિયા સામે 2021ના અંતમાં ટેસ્ટ ડેબ્યૂ કર્યું હતું. મેલબોર્નમાં રમાયેલી તે મેચની ચોથી ઈનિંગ્સમાં બોલેન્ડે 4 ઓવરમાં 7 રન આપીને 6 વિકેટ ઝડપી હતી. તેમાં સ્ટાર બેટર જો રૂટ અને જોની બેયરસ્ટો જેવી મોટી વિકેટો સામેલ હતી. બોલેન્ડે તે ઈનિંગ્સમાં માત્ર 19 બોલમાં 5 વિકેટ પૂરી કરી હતી. સ્કોટ બોલેન્ડ ટેસ્ટ ઈતિહાસમાં સૌથી ઓછા બોલમાં 5 વિકેટ લેનારો બોલર છે.
સ્કોટ બોલેન્ડે અત્યાર સુધી સાત મેચમાં માત્ર 13.42ની એવરેજથી 28 વિકેટ ઝડપી હતી. તેની 13.42ની એવરેજ 20મી સદીની શરૂઆત પછી ઓછામાં ઓછા 1000 બોલ ફેંકનાર કોઈ પણ ટેસ્ટ ક્રિકેટરની સૌથી ઓછી છે. આ જ કારણ છે કે તે વર્લ્ડ ટેસ્ટ ચેમ્પિયનશિપની ફાઈનલમાં ટીમ ઈન્ડિયા માટે મોટો ખતરો બની રહેશે.
ઓસ્ટ્રેલિયાનું આક્રમક કેવું રહેશે?
વર્લ્ડ ટેસ્ટ ચેમ્પિયનશિપની ફાઈનલમાં ઓસ્ટ્રેલિયા ત્રણ અગ્રણી ઝડપી બોલરો તેમજ એક સ્પિનર સાથે મેદાનમાં ઉતરશે. કેપ્ટન પેટ કમિન્સની સાથે મિચેલ સ્ટાર્ક અને સ્કોટ બોલેન્ડ ફાસ્ટ બોલિંગની જવાબદારી સંભાળશે. જ્યારે ટીમમાં નાથન લિયોન એકમાત્ર સ્પિનર હશે. આ સાથે કેમરૂન ગ્રીન ઝડપી બોલિંગ ઓલરાઉન્ડર તરીકે રમશે. 20 ટેસ્ટની પોતાની કારકિર્દીમાં ગ્રીને 941 રન નોંધાવ્યા છે અને 23 વિકેટ ઝડપી છે.
શા માટે બોલેન્ડની પસંદગી કરવામાં આવી?
પ્લેઈંગ ઈલેવનમાં બોલેન્ડના સમાવેશ અંગે કેપ્ટન પેટ કમિન્સે કહ્યું હતું કે, બોલેન્ડ એક અલગ પ્રકારનો બોલર છે, જે સારી લેન્થ સાથે બોલિંગ કરે છે અને બોલને સીમ પર રાખે છે. મિચેલ સ્ટાર્ક ડાબોડી બોલર છે અને તેથી ઝડપી બોલિંગ આક્રમણમાં વિવિધતા ઉમેરશે. જો સ્કોટ બોલેન્ડ યોગ્ય જગ્યાએ બોલિંગ કરશે તો તે ઘણો સફળ રહેશે.