ઝડપી બોલર્સનો સપાટો, ભારતની લાજવાબ શરૂઆત
ભારતીય ઝડપી બોલર્સે શરૂઆતમાં ઘાતક અંદાજમાં બોલિંગ કરી હતી. ઓપનર ઉસ્માન ખ્વાજા ખાતું પણ ખોલાવી શક્યો ન હતો. મોહમ્મદ સિરાજે તેને ચોથી જ ઓવરમાં પેવેલિયન ભેગો કરી દીધો હતો. ત્યારબાદ ડેવિડ વોર્નર 43 રન નોંધાવીને શાર્દુલ ઠાકુરનો શિકાર બન્યો હતો. તો માર્નસ લાબુશેનને શમીએ બોલ્ડ કર્યો હતો. તેણે 26 રન નોંધાવ્યા હતા. ઓસ્ટ્રેલિયાએ 76 રનમાં તેની ટોચની ત્રણ વિકેટ ગુમાવી દીધી હતી. જ્યારે રોહિત શર્માની ટીમે શરૂઆતમાં પકડ બનાવી લીધી હતી.
ટ્રેવિસ હેડ અને સ્ટિવ સ્મિથે કર્યો વળતો પ્રહાર
ભારતે ઝડપથી ત્રણ વિકેટ ઝડપીને શરૂઆતમાં પકડ બનાવી હતી પરંતુ ટ્રેવિસ હેડના આગમન બાદ ચિત્ર બદલાઈ ગયું હતું. ટ્રેવિસ હેડ બેટિંગમાં આવ્યો ત્યારે ઓસ્ટ્રેલિયન ટીમ દબાણમાં હતી. જોકે, હેડે કોઈ પણ જાતના દબાણ વગર બેટિંગ કરી હતી અને ભારતીય બોલર્સને કોઈ તક આપી ન હતી. તેણે આક્રમક અંદાજમાં બેટિંગ કરી હતી. તેણે ઓસ્ટ્રેલિયા બહાર પોતાની પ્રથમ સદી ફટકારી હતી અને ભારતીય ટીમને બેકફૂટ પર મોકલી દીધી હતી. એક પણ બોલર તેને દબાણમાં લાવી શક્યો ન હતો.
ટ્રેવિસ હેડ જાણે વન-ડે મેચ રમી રહ્યો હોય તેવી રીતે બેટિંગ કરી રહ્યો હતો. બીજી તરફ સ્ટિવ સ્મિથે પોતાના આગવા અંદાજમાં બેટિંગ કરી હતી. તેણે પણ ક્રિઝ પર અડિંગો જમાવી રાખ્યો હતો. સ્મિથ પોતાની સદીથી પાંચ રન દૂર હતો ત્યારે પ્રથમ દિવસની રમત પૂરી થઈ ગઈ હતી. દિવસના અંતે ટ્રેવિસ હેડ અને સ્મિથ રમતમાં હતા. ટ્રેવિસ હેડે 156 બોલમાં 22 ચોગ્ગા અને એક સિક્સરની મદદતી 146 રન નોંધાવ્યા છે જ્યારે સ્મિથે 227 બોલમાં 14 ચોગ્ગાની મદદથી 95 રન નોંધાવ્યા છે. ભારત માટે મોહમ્મદ સિરાજ, મોહમ્મદ શમી અને શાર્દૂલ ઠાકુરને એક-એક સફળતા મળી હતી.