ઈન્ટરનેશનલ ક્રિકેટમાં એન્ટ્રી કર્યા બાદ હોંગકોંગ આગેકૂચ કરી રહ્યું છે અને આ માટે તેમને ભારતીય ખેલાડીઓ પાસેથી પ્રેરણા મળી રહી છે. ટીમના ઘણાં ખેલાડીઓ કોહલીના મોટા ફેન છે અને તેઓ આ અંગે ખુલીને ઘણી વાર કહી પણ ચૂક્યા છે. હવે આખી ટીમે કોહલી પ્રત્યેનો પ્રેમ દર્શાવીને ભારતના દિગ્ગજ ખેલાડીને ખાસ ભેટ આપી છે. હોંગકોંગની ટીમે પોતાની ટીમની જર્સી પર ખાસ મેસેજ લખીને કોહલીને ભેટમાં આપી છે.
હોંગકોગની ટીમે ભેટ કરેલી ટીમની જર્સી પર કોહલી માટે મેસેજ લખ્યો છે કે, “વિરાટ, નવી પેઢીનો ઉત્સાહ વધારવા માટે આભાર. અમે તમારી સાથે છીએ! હજુ આગળ પણ ખાસ દિવસો આવશે. તાકાત અને પ્રેમ સાથે આપનો આભાર. ટીમ હોંગકોંગ.”
હોંગકોંગની ટીમ તરફથી આપવામાં આવેલી ભેટ જોઈને કોહલી પણ ખુશ થઈ ગયો હતો અને તેણે આ અંગે સોશિયલ મીડિયા પર મેસેજ લખીને અને જર્સીનો ફોટો શેર કરીને પોતાના પ્રત્યે વિરુદ્ધ ટીમે દર્શાવેલા પ્રેમને પ્રગટ કર્યો છે. કોહલીએ ઈન્સ્ટા સ્ટોરી શેર કરીને લખ્યું છે કે, “હોંગકોંગની ટીમનો આભાર. આ ભાવ પ્રગટ કરવા બદલ સુખદ અનુભૂતિ કરું છું, આ ખુબ જ સરસ છે.”
આ પણ ત્યારે બન્યું છે જ્યારે વિરાટ કોહલી લાંબા સમય પછી ફરી એકવાર ફોર્મમાં દેખાઈ રહ્યો છે.
બુધવારે ભારતે પહેલા બેટિંગ કરીને હોંગકોંગ સામે 20 ઓવરમાં 192 રન ખડકી દીધા હતા, જેમાં કોહલી અને સૂર્યકુમાર યાદવની ભાગીદારી મહત્વની રહી હતી. કોહલી 44 બોલમાં 59 રન કરીને નોટઆઉટ રહ્યો હતો, જેમાં ત્રણ છગ્ગાનો પણ સમાવેશ થાય છે. જ્યારે સૂર્યકુમાર યાદવે માત્ર 26 બોલમાં ધડાધડ 68 રન ઠોકી માર્યા હતા, જેમાં છ છગ્ગા અને છ ચોગ્ગાનો સમાવેશ થાય છે.
193 રનના લક્ષ્ય સામે મેદાનમાં ઉતરેલી હોંગકોંગની ટીમે પાવરપ્લે દરમિયાન પહેલી 6 ઓવરમાં 51 રન પર બે વિકેટ ગુમાી દીધી હતી. બાબર હયાત (35 બોલમાં 41 રન) અને કિંચિત શાહ (28 બોલમાં 30 રન)એ સારી બેટિંગ કરી હતી, જેના કારણે હોંગકોંગ 5 વિકેટ ગુમાવીને 152 સુધી પહોંચી શક્યું હતું અને 40 રનથી મેચ ગુમાવી હતી.
સૂર્યકુમાર યાદવને ‘મેન ઓફ ધ મેચ’ પસંદ કરવામાં આવ્યો હતો.