રાજસ્થાન રોયલ્સની બેટિંગ વખતે આ ઘટના બની હતી. ઝડપી બોલર મોહમ્મદ શમી પાવરપ્લે દરમિયાન પોતાના બોલિંગ માર્ક તરફ જઈ રહ્યો હતો. આ દરમિયાન હાર્દિક પંડ્યા સંજૂ સેમસન પાસે ધસી ગયો હતો અને તેને તેના કાનમાં કંઈક કહ્યું હતું. હાર્દિક પંડ્યાના શબ્દોથી સંજૂ સેમસન ખુશ જણાયો ન હતો તેમ છતાં તેણે ધીરજ જાળવી રાખી હતી અને સામે કંઈ કહ્યું ન હતું. તેણે પોતાના શબ્દો દ્વારા નહીં પરંતુ બેટ દ્વારા જવાબ આપ્યો હતો. આ ઘટનાનો વિડીયો સોશિયલ મીડિયા પર વાયરલ થયો છે. સોશિયલ મીડિયા યુઝર્સે પણ હાર્દિકની ટીકા કરી હતી.
મેચમાં ગુજરાત ટાઈટન્સે રાજસ્થાન રોયલ્સ સામે 178 રનનો લક્ષ્યાંક મૂક્યો હતો. જેને પાર પાડવા મેદાનમાં ઉતરેલી રાજસ્થાનની ટીમની શરૂઆત ખરાબ રહી હતી. ટીમે 55 રનમાં પોતાની ચાર વિકેટ ગુમાવી દીધી હતી. યશસ્વી જયસ્વાલ અને જોસ બટલરની ઓપનિંગ જોડી કંઈ કમાલ કરી શકી ન હતી. જયસ્વાલ એક રન નોંધાવીને આઉટ થયો હતો જ્યારે બટલર ખાતું પણ ખોલાવી શક્યો ન હતો. જોકે, બાદમાં શિમરોન હેતમાયર અને કેપ્ટન સંજૂ સેમસને જવાબદારી સંભાળી હતી.
રાજસ્થાનની બેટિંગ ધીમી હતી અને જરૂરી રન રેટ વધી રહી હતી. તેવામાં સેમસને ગુજરાતના સ્ટાર સ્પિનર રાશિદ ખાનની એક ઓવરમાં સળંગ ત્રણ સિક્સર ફટકારી દીધી હતી અને ટીમને મેચમાં પરત લાવ્યો હતો. સેમસને 32 બોલમાં 60 રનની આક્રમક ઈનિંગ્સ રમીને આઉટ થયો હતો. પરંતુ હેતમાયરે એક છેડો જાળવી રાખ્યો હતો અને ટીમને જીત અપાવી હતી. તેણે 26 બોલમાં બે ચોગ્ગા અને પાંચ સિક્સરની મદદથી 56 રનની અણનમ ઈનિંગ્સ રમી હતી. રાજસ્થાને ચાર બોલ બાકી રાખતા મેચ જીતી લીધી હતી.