ગુજરાત અને વિદર્ભ વચ્ચે જે મેદાન પર આ મુકાબલો રમાયો હતો ત્યાં ભારત અને ઓસ્ટ્રેલિયા વચ્ચે રમાનારી ટેસ્ટ સિરીઝની પ્રથમ ટેસ્ટ રમાશે. આ ટેસ્ટ શરૂ થવામાં હવે એક મહિનાથી પણ ઓછો સમય બાકી રહ્યો છે. આ પિચ પર એક જ દિવસમાં 15 વિકેટ પડી હતી જ્યારે બીજા દિવસે 16 વિકેટો પડી હતી. રણજી ટ્રોફીની આ મેચ સાઈડ પિચ પર રમાઈ હતી જયારે ટેસ્ટ મેચ સેન્ટર પિચ પર રમાશે.
73 રનના લક્ષ્યાંકને પાર પાડવા મેદાનમાં ઉતરેલી ગુજરાતની ટીમે એક વિકેટે છ રનથી પોતાનો દાવ આગળ ધપાવ્યો હતો પરંતુ ટીમ ત્રીજા દિવસના પ્રથમ સત્રમાં જ 31 ઓવરમાં 54 રનમાં જ તંબૂ ભેગી થઈ ગઈ હતી. સ્પિનર સરવતેની ઘાતક બોલિંગ સામે ગુજરાતના બેટર્સ ઘૂંટણીયે પડી ગયા હતા. તેણે 15.3 ઓવરમાં 17 રન આપીને છ વિકેટ ઝડપી હતી. જ્યારે પ્રથમ ઈનિંગ્સમાં તેણે 64 રન આપીને પાંચ વિકેટ ખેરવી હતી. તેણે પોતાની ડોમેસ્ટિક કારકિર્દીનું સર્વશ્રેષ્ઠ પ્રદર્શન કરતાં 81 રનમાં 11 વિકેટ ઝડપી હતી.
સરવતેને તેના સાથી સ્પિનર હર્ષ દુબે તરફથી સારો સહકાર સાંપડ્યો હતો. તેણે 9 ઓવરમાં 11 રન આપીને ત્રણ વિકેટ ઝડપી હતી. ગુજરાત માટે ફક્ત એક જ બેટર બે આંકડાનો સ્કોર નોંધાવી શક્યો હતો. ત્રીજા ક્રમે બેટિંગમાં આવેલા સિદ્ધાર્થ દેસાઈએ ગુજરાત માટે સૌથી વધુ 18 રન નોંધાવ્યા હતા અને તે રન આઉટ થયો હતો.
ટોસ જીતીને પ્રથમ બેટિંગ કરતા વિદર્ભની પ્રથમ ઈનિંગ્સ 30.3 ઓવરમાં 74 રનના સ્કોર પર સમેટાઈ ગઈ હતી. ગુજરાતની ઝડપી બોલિંગ જોડી ચિંતન ગજા અને તેજસ પટેલે પાંચ-પાંચ વિકેટ ઝડપી હતી. ગુજરાતે તેના પ્રથમ દાવમાં 256 રનનો સ્કોર નોંધાવીને 182 રનની સરસાઈ મેળવી હતી. જોકે, બીજા દાવમાં વિદર્ભે લડત આપી હતી જેમાં જિતેશ શર્માએ 53 રનની ઈનિંગ્સ રમી હતી. જ્યારે લોઅર ઓર્ડરના બેટર નચિકેત ભુતેએ 42 રનનું યોગદાન આપ્યું હતું.
બીજા દાવમાં સિદ્ધાર્થ દેસાઈએ લાજવાબ બોલિંગ કરી હતી અને 74 રનમાં છ વિકેટ ઝડપી હતી જેના કારણે વિદર્ભનો બીજો દાવ 254 રનમાં સમેટાઈ ગયો હતો. આ સાથે ગુજરાત સામે 73 રનનો આસાન લક્ષ્યાંક આવ્યો હતો. પરંતુ સરવતેએ પોતાની ઘાતક બોલિંગની મદદથી મેચની બાજી પલટી દીધી હતી અને પોતાની ટીમનું નામે રેકોર્ડ બૂકમાં નોંધાવી દીધું હતું. આ વિજય સાથે વિદર્ભને છ પોઈન્ટ મળ્યા હતા.