ડેવિડ વોર્નર વિશ્વના આક્રમક ઓપનર્સમાં સામેલ છે. જોકે, છેલ્લા ઘણા સમયથી તે કંગાળ ફોર્મમાં રમી રહ્યો હતો અને તેના કારણે તેની ટીકાઓ પણ થઈ હતી. જોકે, પોતાની 100મી ટેસ્ટમાં તેણે લાજવાબ બેટિંગ કરી હતી. વોર્નરે ત્રણ વર્ષ બાદ સદી ફટકારી હતી. આ દરમિયાન 36 વર્ષીય વોર્નર ટેસ્ટ ક્રિકેટમાં 8000 રન પૂરા કરનારો આઠમો ઓસ્ટ્રેલિયન બેટર બની ગયો છે.
100મી ટેસ્ટમાં સદી ફટકારનારો 10મો ખેલાડી બન્યો
ડેવિડ વોર્નર પોતાની 100મી ટેસ્ટમાં સદી ફટકારનારો આઠમો બેટર બન્યો છે. આ યાદીમાં વોર્નર ઉપરાંત કોલિન કાઉડ્રી (ઈંગ્લેન્ડ), જાવેદ મિંયાદાદ (પાકિસ્તાન), ગોર્ડન ગ્રીનિજ (વેસ્ટ ઈન્ડિઝ), એલેક સ્ટુઅર્ટ (ઈંગ્લેન્ડ), ઈન્ઝમામ ઉલ હક (પાકિસ્તાન), રિકી પોન્ટિંગ (ઓસ્ટ્રેલિયા), ગ્રીમ સ્મિથ (સાઉથ આફ્રિકા), હાશિમ અમલા (સાઉથ આફ્રિકા) અને જો રૂટ (ઈંગ્લેન્ડ)નો સમાવેશ થાય છે.
રિકી પોન્ટિંગે બે સદી ફટકારી હતી
ડેવિડ વોર્નરે પોતાની 100મી ટેસ્ટમાં સદી ફટકારી અને તે આવું કરનારો બીજો ઓસ્ટ્રેલિયન બેટર બની ગયો છે. અગાઉ રિકી પોન્ટિંગે પોતાની 100મી ટેસ્ટમાં સદી ફટકારી હતી. જોકે, પોન્ટિંગે પોતાની 100મી ટેસ્ટના બંને દાવમાં સદી ફટકારી હતી. 2006માં સાઉથ આફ્રિકા સામે પોતાની 100મી ટેસ્ટમાં પોન્ટિંગે 120 અને અણનમ 143 રનની ઈનિંગ્સ રમી હતી.
જાન્યુઆરી 2020 બાદ પ્રથમ ટેસ્ટ સદી ફટકારી
ડેવિડ વોર્નર છેલ્લા ત્રણ વર્ષથી કંગાળ ફોર્મમાં રમી રહ્યો હતો. તેણે જાન્યુઆરી 2020 બાદ પ્રથમ સદી ફટકારી હતી. આ તેની કારકિર્દીની 25મી ટેસ્ટ સદી હતી. તેણે 144 બોલમાં જ પોતાની સદી પૂરી કરી હતી. સદી પૂરી કર્યા બાદ તેણે પોતાની ટ્રેડમાર્ક સ્ટાઈલમાં ઉજવણી કરી હતી. તેણે હવામાં કૂદકો લગાવીને હવામાં પંચ મારીને પોતાની સદીની ઉજવણી કરી હતી.