રોનાલ્ડોની ગણના વિશ્વના સર્વકાલિન મહાન ફૂટબોલર્સમાં થાય છે. તે પાંચ વખત બેલન ડીઓર એવોર્ડ જીતી ચૂક્યો છે અને તેના નામે પાંચ ચેમ્પિયન્સ લીગ ટાઈટલ બોલે છે. ફૂટબોલ વર્લ્ડ કપ દરમિયાન તેની ક્લબ માન્ચેસ્ટર યુનાઈટેડે તેને છૂટો કરી દીધો હતો અને ત્યારબાદ તે અલ નાસર સાથે જોડાયો છે. કહેવામાં આવી રહ્યું છે કે રોનાલ્ડોએ 200 મિલિયન યુરોનો કરાર કર્યો છે જે જૂન 2025 સુધીનો છે.
રોનાલ્ડોએ જણાવ્યું હતું કે, સાઉદી અરબ આવવું તે મારી કારકિર્દીનો અંત નથી. તેથી જ મેં પરિવર્તન પસંદ કર્યું છે અને પ્રામાણિકતાથી કહું તો લોકો શું કહી રહ્યા છે તેના વિશે મને કંઈ પડી નથી. યુરોપમાં મારું કામ પૂરું થયું છે. યુરોપમાંથી મને ઘણી બધી ઓફર્સ હતી, બ્રાઝિલ, ઓસ્ટ્રેલિયા, અમેરિકા અને પોર્ટુગલમાંથી પણ મારી પાસે ઘણી બધી ઓફર્સ હતી. ઘણી ક્લબોએ મને સાઈન કરવાનો પ્રયાસ કર્યો હતો પરંતુ મેં આ ક્લબને વચન આપી દીધું હતું.
રોનાલ્ડો અલ નાસરની યલો અને બ્લુ કિટ પહેરીને આવ્યો તે સાથે જ 25,000 પ્રેક્ષકોની ક્ષમતા ધરાવતા સ્ટેડિયમમાં હાજર ચાહકોએ તેને વધાવી લીધો હતો. તેની આસપાસ ફ્લડલાઈટ્સ થઈ રહી હતી અને આતશબાજી પણ થઈ રહી હતી. તેણે હાથ હલાવીને ચાહકોનું અભિવાદન કર્યું હતું. તેની ગર્લફ્રેન્ડ જ્યોર્જિના રોડ્રિગ્સ અને રોનાલ્ડોના બાળકો પણ ત્યાં હાજર રહ્યા હતા. રોનાલ્ડોએ કહ્યું હતું કે, હું યુનિક ખેલાડી છું. મેં યુરોપમાં બધા જ રેકોર્ડ્સ તોડી દીધા છે અને અહીં આવવું ઘણું સારું છે. હું અહીં પણ કેટલાક રેકોર્ડ્સ તોડવા ઈચ્છું છું.
અલ નાસર સાઉદી અરબની અગ્રણી ફૂટબોલ ક્લબમાં સામેલ છે. તે નવ વખત સાઉદી લીગ ચેમ્પિયનશિપ જીતી ચૂકી છે. રોનાલ્ડો અલ નાસર અગાઉ માન્ચેસ્ટર યુનાઈટેડ, રિયલ મેડ્રિડ અને જુવેન્ટસ જેવી મોટી ક્લબો માટે રમી ચૂક્યો છે. સાઉદી અરબ હવે સ્પોર્ટ્સ ઈન્ડસ્ટ્રીઝમાં પણ આગળ વધવાના પ્રયાસો કરી રહ્યું છે. સાઉદીએ ફૂટબોલ વર્લ્ડ કપની યજમાની માટે પણ બિડ કરી છે.