દ્રવિડે ચેન્નઈમાં કહ્યું હતું કે મને લાગે છે કે જો ભવિષ્ય માટે જોવામાં આવે તો અમે જે ટીમ અને ખેલાડીઓ ઈચ્છીએ છીએ તેને લઈને અમે સ્પષ્ટ છીએ. અમે 17-18 ખેલાડીઓ પસંદ કરી લીધા છે. અમારી પાસે કેટલાક ખેલાડી છે જેઓ ઈજામુક્ત થઈ રહ્યા છે. તેમની રિકવરી જોતા તેઓ ફ્રેમમાં આવી શકે છે. જોકે, જોવાનું તે રહેશે કે તેઓ કમબેક માટે કેટલો સમય લે છે. એકંદરે અમે તેને લઈને સ્પષ્ટ છીએ કે અમે કેવી ટીમ ઈચ્છીએ છીએ.
હવે કોચ દ્રવિડના આ નિવેદન બાદ સંજૂ સેમસનને ચોક્કસથી નિરાશા થઈ હશે. કેમ કે વર્તમાન ટીમ પસંદગી જોતા એવું લાગી રહ્યું છે કે સેમસન વન-ડે વર્લ્ડ કપ માટે ટીમ ઈન્ડિયાના પ્લાનનો હિસ્સો નથી. પરંતુ જસપ્રિત બુમરાહ, શ્રેયસ ઐય્યર કે પછી સૂર્યકુમાર યાદવ છે તો કદાચ કોચની વાતથી તેમને રાહત મળી હશે.
સૂર્યકુમાર યાદવ ઓસ્ટ્રેલિયા સામેની ત્રણેય વન-ડેમાં ખાતું ખોલાવી શક્યો ન હતો. પરંતુ દ્રવિડને તેની કોઈ ચિંતા કે દરકાર નથી. દ્રવિડનું કહેવું છે કે સૂર્યકુમાર યાદવ હજી વન-ડે ક્રિકેટ શીખી રહ્યો છે. ટી20 ફોર્મેટ અલગ હોય છે. સૂર્યકુમાર લાંબા સમયથી ટી20 ક્રિકેટ રમી રહ્યો છે. તે 10 વર્ષથી આઈપીએલમાં રમી રહ્યો છે. આઈપીએલ એક ઈન્ટરનેશનલ ટુર્નામેન્ટ જેવી છે અને સૂર્યકુમારે તેમાં અત્યંત દબાણમાં પણ શ્રેષ્ઠ પ્રદર્શન કર્યું છે. પરંતુ તેને વન-ડે ક્રિકેટ રમવાની વધારે તક મળી નથી. તેથી તેને થોડો સમય આપવાની જરૂર છે. આમ દ્રવિડે સૂર્યકુમારનું સમર્થન કર્યું છે અને સંકેત પણ આપી દીધો છે કે તે વન-ડે ટીમનો ભાગ રહેશે.
પરંતુ સંજૂ સેમસનના ફેન્સ કદાચ કોચ દ્રવિડના આ તર્કથી સહમત નહીં હોય. કેમ કે એક ખેલાડી સતત નિષ્ફળ જઈ રહ્યો હોવા છતાં રમવાની તક મળતી રહી છે. લોકેશ રાહુલને સતત તક આપવામાં આવી રહી છે જ્યારે શાનદાર રેકોર્ડ હોવા છતાં સંજૂ સેમસનને ટીમની બહાર રહેવું પડે છે. જેના કારણે તે વર્લ્ડ કપની ટીમ માટે પોતાની દાવેદારી પણ રજૂ કરી શકતો નથી.