cheteshwar pujara, ભારત વિ. બાંગ્લાદેશ બીજી ટેસ્ટઃ ચેતેશ્વર પૂજારા પાસે ડોન બ્રેડમેનનો રેકોર્ડ તોડવાની તક – india vs bangladesh 2nd test cheteshwar pujara set to go past don bradman

ભારતીય ક્રિકેટ ટીમે બાંગ્લાદેશ સામે પ્રથમ ટેસ્ટમાં 188 રને શાનદાર વિજય નોંધાવ્યો હતો. જેમાં ચેતેશ્વર પૂજારાએ મહત્વની ભૂમિકા ભજવી હતી. પ્રથમ ઈનિંગ્સમાં પૂજારા સદી ચૂકી ગયો હતો અને તે 90 રન પર આઉટ થઈ ગયો હતો. જોકે, બીજી દાવમાં તેણે ફરીથી લાજવાબ બેટિંગ કરીને સદી પૂરી કરી હતી. આ સાથે તેણે 19મી સદી પૂરી કરી હતી. આ સદી તેની કારકિર્દીની અત્યાર સુધીની સૌથી ઝડપી સદી હતી. તેણે 130 બોલમાં 78.46ની સ્ટ્રાઈક રેટ સાથે 102 રનની અણનમ ઈનિંગ્સ રમી હતી. ભારત અને બાંગ્લાદેશ વચ્ચે 22 ડિસેમ્બર ગુરૂવારથી બીજી ટેસ્ટ મેચનો પ્રારંભ થશે. રોહિત શર્મા ઈજાગ્રસ્ત હોવાના કારણે લોકેશ રાહુલ આ મેચમાં પણ ટીમની કેપ્ટનસી કરશે.

19 સદી સાથે પૂજારાએ ન્યૂઝીલેન્ડના રોસ ટેલર, વેસ્ટ ઈન્ડિઝના ગોર્ડન ગ્રીનિજ અને ક્લાઈવ લોઈડ તથા ઓસ્ટ્રેલિયાના માઈકલ હસ્સીની બરાબરી કરી લીધી છે. આ મેચ જીતીને ભારતે બે મેચની સીરિઝમાં 1-0ની સરસાઈ મેળવી લીધી છે. હવે ભારત અને બાંગ્લાદેશ વચ્ચે 22 ડિસેમ્બર ગુરૂવારથી બીજી ટેસ્ટ મેચનો પ્રારંભ થશે. આ મેચમાં પૂજારા પાસે ઓસ્ટ્રેલિયાના લિજેન્ડરી સર ડોનાલ્ડ બ્રેડમેનનો રેકોર્ડ તોડવાની તક રહેલી છે.

પૂજારાએ અત્યાર સુધી ટેસ્ટ ક્રિકેટમાં 6984 રન નોંધાવ્યા છે. હવે તેને ડોન બ્રેડમેનના રેકોર્ડને તોડવામાં 12 રનની જરૂર છે. ડોન બ્રેડમેને 52 ટેસ્ટ મેચમાં 99.94ની અવિશ્વસનિય એવરેજ સાથે 6996 રન નોંધાવ્યા હતા. પૂજારાએ 2010માં ઓસ્ટ્રેલિયા વિરુદ્ધ ટેસ્ટ પદાર્પણ કર્યું હતું. તેણે 97 ટેસ્ટમાં 44.76ની સરેરાશ સાથે 6984 રન નોંધાવ્યા છે. ભારત માટે ટેસ્ટમાં સૌથી વધુ ટેસ્ટ રન નોંધાવવાના મામલે પૂજારા આઠમાં ક્રમે છે. આ યાદીમાં સચિન તેંડુલકર ટોચ પર છે. સચિને 200 ટેસ્ટમાં 53.78ની એરેજથી 15921 રન નોંધાવ્યા હતા. આ યાદીમાં સચિન બાદ રાહુલ દ્રવિડ, સુનીલ ગાવસ્કર, વીવીએસ લક્ષ્મણ, વીરેન્દ્ર સહેવાગ, વિરાટ કોહલી અને સૌરવ ગાંગુલી આવે છે.