અફઘાનિસ્તાન સામે હાર પછી લીધો મોટો નિર્ણય
ત્રણ વનડેની સિરિઝમાં અફઘાનિસ્તાન સામે શરમજનક હાર બાદ તમિમ ઈકબાલે આ નિર્ણય લીધો છે. આ પછી તેની કેપ્ટનશિપની ટીકા થઈ રહી હતી. સોશિયલ મીડિયા પર ફેન્સ ખૂબ જ ગુસ્સામાં જોવા મળી રહ્યા હતા. બાંગ્લાદેશ ક્રિકેટ બોર્ડે નવા કેપ્ટનનું નામ જાહેર કર્યું નથી, પરંતુ શાકિબ અલ હસન ટી20 અને લિટન દાસ ટેસ્ટ કેપ્ટન છે. શક્ય છે કે આ બંનેમાંથી કોઈ એકને આ વનડેની જવાબદારી મળી શકે છે. 34 વર્ષીય તમિમ ગયા વર્ષે આ સમયની આસપાસ T20 આંતરરાષ્ટ્રીયમાંથી નિવૃત્ત થયો હતો, તેણે પોતાની છેલ્લી ટેસ્ટ એપ્રિલમાં આયર્લેન્ડ સામે રમી હતી.
તમિમે ફેબ્રુઆરી 2007માં ODI ડેબ્યૂ કર્યું હતું અને આંતરરાષ્ટ્રીય ક્રિકેટમાં પ્રવેશ કર્યો હતો. વેસ્ટ ઇન્ડીઝમાં રમાયેલા વર્લ્ડ કપમાં ભારત સામે બાંગ્લાદેશની આઇકોનિક જીતમાં મેચ-વિનિંગ અડધી સદી પણ ફટકારી હતી. તેના દેશ માટે સૌથી વધુ ODI રન (8313) અને સદી (14) નો રેકોર્ડ પણ તમિમના નામે છે. વિરાટ કોહલી અને રોહિત શર્મા પછી તે વર્તમાન ક્રિકેટરોમાં સૌથી વધુ રન બનાવનારો ત્રીજો બેટ્સમેન છે.
તમિમનો કેપ્ટન તરીકે ટ્રેક રેકોર્ડ પણ શાનદાર
ટેસ્ટ બેટ્સમેન તરીકે તમિમ 70 મેચમાં 10 સદી સાથે 38.89ની એવરેજથી 5134 રન બનાવ્યા છે. આ કોઈ પણ બાંગ્લાદેશી બેટ્સમેનના બીજા સૌથી વધુ રન છે. ODI કેપ્ટન તરીકે તમિમની જીતની ટકાવારી બાંગ્લાદેશના સફળ કેપ્ટન તરીકે ગણાતા મશરફે મોર્તઝા કરતા થોડી વધારે છે. તમિમ કેપ્ટન તરીકે 37 માંથી 21 ODI જીત્યો છે, જ્યારે તેણે ODI સુપર લીગમાં બાંગ્લાદેશને ત્રીજા સ્થાને પહોંચાડ્યું છે. આનાથી તેની ટીમ ભારતમાં આ ઓક્ટોબર અને નવેમ્બરમાં યોજાનારા વર્લ્ડ કપ માટે ક્વોલિફાય કરી શકી હતી. તેણે 2017માં ન્યૂઝીલેન્ડ સામેની ટેસ્ટ મેચમાં બાંગ્લાદેશની કેપ્ટનશિપ પણ કરી હતી.