ઓલ-રાઉન્ડર રવિન્દ્ર જાડેજાની ખોટ સાલશે
ભારતને આ મેચમાં રવિન્દ્ર જાડેજાના રૂપમાં મોટી ખોટ સાલશે જે ઘૂંટણની ઈજાના કારણે ટુર્નામેન્ટમાંથી બહાર થઈ ગયો છે. જાડેજાના સ્થાને અક્ષર પટેલને ટીમમાં સામેલ કરવામાં આવ્યો છે. પરંતુ સૌરાષ્ટ્રના ઓલ-રાઉન્ડરની ગેરહાજરીમાં ટીમના કોમ્બિનેશનને ચોક્કસથી અસર પડશે. મુખ્ય કોચ રાહુલ દ્રવિડ અને સુકાની રોહિત શર્માએ રણનીતિ અંગે ફરીથી વિચાર કરવો પડશે. પાકિસ્તાન સામેની પ્રથમ મેચમાં ટીમ મેનેજમેન્ટે જાડેજાને બેટિંગ ક્રમમાં પ્રમોટ કરતા ચોથા ક્રમે મોકલ્યો હતો. જેમાં તેણે સારું પ્રદર્શન કર્યું હતું અને ટીમના વિજયમાં મહત્વની ભૂમિકા ભજવી હતી.
રિશભ પંત કે દિનેશ કાર્તિક? ઓપનિંગમાં ફેરફાર કરાશે?
જાડેજાની ગેરહાજરીમાં ભારતને ડાબોડી બેટરની જરૂર પડશે અને તેવામાં કોચ દ્રવિડ રિશભ પંતને સામેલ કરશે કે નહીં તે જોવાનું રહેશે. ડાબોડી બેટરની જગ્યા લેવા માટે પંત એકમાત્ર શ્રેષ્ઠ પસંદગી બની શકે છે તે કહેવું વધારે પડતું ગણાશે નહીં. જોકે, છેલ્લા ઘણા સમયથી દિનેશ કાર્તિક શાનદાર ફોર્મમાં છે અને અત્યંત દબાણ ભરેલી પરિસ્થિતિમાં પણ તે ધીરજ રાખીને ટીમને વિજય અપાવવાની ક્ષમતા ધરાવે છે. પ્રથમ બે મેચમાં તેના ભાગે બેટિંગની વધારે તક આવી નથી તેવામાં જોવાનું એ રહેશે કે ટીમ મેનેજમેન્ટ કોને તક આપે છે. બીજી તરફ ઓપનરમાં લોકેશ રાહુલ પાકિસ્તાન સામે ખાતું ખોલાવી શક્યો ન હતો. જ્યારે હોંગકોંગ સામે પણ તેણે 39 બોલમાં 36 રનની ઈનિંગ્સ રમી હતી. તેવામાં ટીમ ઓપનિંગ કોમ્બિનેશનમાં ફેરફાર કરે છે કે નહીં તે પણ જોવાનું રહેશે.
વિરાટ કોહલી, હાર્દિક પંડ્યા અને સૂર્યકુમાર યાદવ છે ફોર્મમાં
ભારતનો મિડલ ઓર્ડર મજબૂત છે. વિરાટ કોહલી લયમાં જોવા મળી રહ્યો છે. જ્યારે હાર્દિક પંડ્યા અને સૂર્યકુમાર યાદવ ફોર્મમાં છે. પાકિસ્તાન સામેની મેચમાં હાર્દિક પંડ્યાએ પરિપક્વતા દેખાડી હતી અને દબાણ ભરેલી પરિસ્થિતિમાં પણ ધીરજ દેખાડીને અંતિમ ઓવરમાં સિક્સર ફટકારીને ટીમને વિજય અપાવ્યો હતો. બોલિંગમાં પણ તે શાનદાર પ્રદર્શન કર્યું હતું. જ્યારે સૂર્યકુમાર યાદવ પણ ફોર્મમાં છે.
પાકિસ્તાન પણ વળતો પ્રહાર કરવા માટે મક્કમ
ભલે પ્રથમ મેચમાં પાકિસ્તાનને પરાજયનો સામનો કરવો પડ્યો હોય પરંતુ તે ઘણી મજબૂત ટીમ છે. વિકેટકીપર ઓપનર મોહમ્મદ રિઝવાન ફોર્મમાં છે. ભારત સામે પણ તેણે સૌથી વધુ રનની ઈનિંગ્સ રમી હતી. જ્યારે સુકાની ઓપનર બાબર આઝમ ભલે નિષ્ફળ રહ્યો હોય પરંતુ તે એકલા હાથે મેચની બાજી પલટી શકે છે. ટોપ સિક્સમાં પાકિસ્તાન પાસે ફખર ઝમાન અને ખુશદિલ શાહ તરીકે બે ડાબોડી બેટર છે. જ્યારે બોલિંગમાં પણ પાકિસ્તાનનું પ્રદર્શન પ્રભાવશાળી રહ્યું હતું.