મુંબઈ ઈન્ડિયન્સના લેફ્ટ આર્મ પેસર અર્જુનને તેની પહેલી જ મેચમાં પ્રથમ ઓવરની જવાબદારી સોંપવામાં આવી હતી. તેણે ચોથા બોલ પર જ જોરદાર અપીલ કરી હતી, પરંતુ તેને વિકેટ મળી ન હતી. અર્જુન બોલને સ્વિંગ કરી રહ્યો હતો પરંતુ તેની પાસે ગતિ નહોતી. જો કે રોહિત શર્મા આ મેચ નથી રમી રહ્યો, પરંતુ મેચની શરૂઆત પહેલા રોહિતે જ તેને ડેબ્યૂ કેપ આપી અને તેને પ્રોત્સાહિત કર્યો.
13 વર્ષ અગાઉ જ્યારે સચિન તેંડુલકર પોતાની કારકિર્દીના અંતિમ તબક્કામાં રમી રહ્યો હતો ત્યારે તેની સાથે હંમેશાં એક નાનકડો છોકરો અર્જુન જોવા મળતો હતો. તે સિનિયર ક્રિકેટર્સ સાથે દોડતો, ભાગતો, ટ્રેનિંગ કરતા જોતો અને તેવું કરવાનો પ્રયાસ કરતો જેવું તેના પિતા કરતા હતા. થોડા જ સમયમાં ખ્યાલ આવી ગયો કે અર્જુન પણ પોતાના પિતાના રસ્તે ચાલવા લાગ્યો છે. તે પણ મહાન સચિનની જેમ ક્રિકેટર બનવા ઈચ્છે છે. જોકે, તેનો માર્ગ આસાન રહ્યો નથી અને રહેશે પણ નહીં. કેમ કે મહાન પિતાનો પુત્ર હોવાથી જ બધું મળી જતું નથી. સચિન પણ જાણે છે કે ડગલેને પગલે અર્જુનની તુલના તેની સાથે થશે. અર્જુન તેંડુલકરે રણજી ટ્રોફીમાં ડેબ્યુ કર્યું અને એવી સિદ્ધિ નોંધાવી જેવી તેના પિતાએ નોંધાવી હતી.
અર્જુન તેંડુલકરનો ઉછેર ઘણો લાડમાં થયો છે. ત્યારે તમામ લોકોને લાગ્યું હશે કે તે પણ તે ક્રિકેટર્સના પુત્રોની જેમ ઝાકમઝોળમાં ખોવાઈ ન જાય. સ્ટાર ખેલાડીઓથી ભરેલી મુંબઈની રણજી ટીમમાં અર્જુનને તક મળી રહી ન હતી. જેના કારણે તેણે ગોવા ટીમ માટે રમવાનું નક્કી કર્યું. બીજી તરફ સચિનને પણ ખ્યાલ આવી ગયો હતો કે પુત્રને હવે પોતાના પડછાયામાંથી બહાર કરવાનો સમય આવી ગયો છે. તેના માટે એક સારા કોચની શોધ સચિનને હતી. સચિનને એવા કોચની જરૂર ન હતી જે તેના માટે રૂમાલ લઈને ઊભો હોય. સચિન ઈચ્છતો હતો કે અર્જુનના ગુરૂ પણ આચરેકર જેવા હોય જે ભૂલ થાય ત્યારે થપ્પડ પણ મારે.
જ્યારે અર્જુન યોગરાજ પાસે પહોંચ્યો ત્યારે સૌથી પહેલા તેને તે વાત સાંભળવા મળી કે 15 દિવસ ભૂલી જા કે તું સચિનનો પુત્ર છે. યુવરાજ સિંહે કોલ કર્યો હતો અને યોગરાજે અર્જુનને ટ્રેઈન કરવાની જવાબદારી સંભાળી હતી. આ બે સપ્તાહ બૂટ કેમ્પ જેવા હતા. આર્મી જેવી ટ્રેનિંગ હતી. સવારે 5 વાગ્યે ઉઠવાનું, બે કલાક દોડવાનું અને બાદમાં જિમ સત્ર શરૂ થતું હતું. અર્જુનને કહેવામાં આવ્યું હતું કે પોતાના સ્નાયુઓને ટોન કરવા અને ઈજા લાગવાની સંભાવના ઓછી કરવા માટે પોતાના બોડીવેઈટનો ઉપયોગ કરીને કસરત કરે.